سانحہ 9مئی کے مفرور ملزمان کی گرفتاری کے لیے پولیس نے پھر ایکشن میں آگئی

لاہور (زور آور نیوز) 9 مئی واقعات،مفرور ملزمان کی گرفتاری کیلئے پولیس کی ٹیمیں تشکیل دے دی گئیں۔ تفصیلات کے مطابق سانحہ 9 کے مفرور ملزمان کی گرفتاریوں کیلئے کریک ڈاؤن کا آغاز کر دیا گیا۔ پولیس نے 320 مفرور ملزمان کی لسٹیں دوبارہ مرتب کر لیں،جبکہ ملزمان کی گرفتاری کیلئے سی آئی اے اور انوسٹی گیشن ٹیمز بھی تشکیل دے دی گئیں۔9 مئی واقعات میں دہشت گردی دفعات کے تحت 14 مقدمات درج ہیں،ذرائع کے مطابق پولیس تاحال 1346 ملزمان کو ہی گرفتار کر سکی ہے۔ سی سی پی اور لاہور نے مفرور ملزمان کو جلد از جلد گرفتار کرنے کی ہدایت کر دی۔ یاد رہے کہ اس سے قبل پولیس نے 9 مئی واقعات کے درج مقدمات میں پی ٹی آئی رہنماؤں کے اشتہاری رہنماؤں کی جائیداد ضبط کرنے کی اجازت مانگی تھی۔پی ٹی آئی کے 22 رہنماؤں کی جائیداد قرق کرنے کی اجازت انسداد دہشت گردی عدالت سے مانگی گئی تھی۔ ملزمان کو 9 مئی واقعات میں ملوث پائے جانے پر تفتیشی ٹیم نے اشتہاری قرار دیا۔ جبکہ 9 مئی جلاؤ گھیراؤ کے مقدمے میں انسداد دہشت گردی عدالت نے پی ٹی آئی کے چار رہنماؤں کے خلاف اشتہاری کی کارروائی کا آغاز کیا۔ ان رہنماؤں میں حماد اظہر کے علاوہ،غلام عباس، علی عباس اور سرمد ملک شامل ہیں۔انسداد دہشت گردی عدالت کے جج اعجاز احمد بٹر نے پولیس کی درخواست پر سماعت کی۔ عدالت نے تھانہ گلبرگ پولیس کی درخواست پر کارروائی شروع کی۔ پولیس نے درخواست میں مؤقف اپنایا کہ ملزمان کو گرفتار کرنے کے لیے متعدد کوششیں کیں لیکن ملزمان گرفتاری کے خوف سے روپوش ہیں، اس لیے عدالت ملزمان کے خلاف اشتہاری کی کارروائی شروع کرنے کا حکم دے۔ خیال رہے کہ 9 مئی کیس میں پاکستان تحریک انصاف کے متعدد سینئر رہنماؤں کو اشتہاری قرار دیا جا چکا ہے،جن میں میاں اسلم اقبال، مراد سعید ، فرح حبیب اور علی امین گنڈا پور سمیت 22 افراد شامل ہیں۔