ؑعثمان ڈار کی والدہ کی عزت میرے دل میں ہے ،میرا ردعمل بنتا ہی نہیں ۔خواجہ آصف

اسلام آباد (زورآور نیوز پاکستان مسلم لیگ ن کے سینیئر رہنما خواجہ آصف کا کہنا ہے کہ عثمان ڈار والے کیس میں میرا رد عمل دینا بنتا ہی نہیں، عثمان ڈار کی والدہ کے لیے میرے دل میں بڑی عزت ہے۔انہوں نےنجی ٹی وی کے پروگرام میں گفتگو کرتے ہوئے کہا کہ عثمان ڈار کے گھر والوں کے بیانات میں خاصے تضاد ہیں، ان کے گھر والے، والدہ اور بھائی اپنے بیانات کو پہلے اپس میں ملا لیں۔خواجہ آصف نے کہا نو مئی کو ایک ہی دن ایک ہی وقت میں ملک بھر میں فوجی تنصیبات پر حملہ کیا گیا ،نو مئی کے واقعات پر اب یہ لوگ خود شہادتیں دے رہے ہیں ۔خیال رہے کہ ثمان ڈار کی والدہ نے اپنے ویڈیو بیان میں کہا ہے کہ سیاست عثمان ڈار نے چھوڑی ہے، اس کی ماں نے نہیں، عمران خان کے ساتھ کھڑی ہوں۔پی ٹی آئی رہنما اور سابق وفاقی وزیر مونس الہی نے سماجی رابطوں کی ویب سائٹ ایکس پر ایک ویڈیو شیئر کی ہے، جس میں عثمان ڈار کی والدہ نے اپنے بیٹے عثمان ڈار کی جانب سے سیاست چھوڑنے کے اعلان پر ردعمل کا اظہار کیا ہے۔عثمان ڈار کی والدہ نے اپنے ویڈیو بیان میں کہا کہ خواجہ آصف تم نے عثمان ڈار کو گن پوائنٹ پر رکھ کر اپنے مقاصد پورے کیے ہیں، سیاست عثمان ڈار نے چھوڑی ہے اس کی والدہ نے نہیں۔ انہوں نے سینئر لیگی رہنما خواجہ آصف کو مخاطب کرتے ہوئے کہا کہ اب سیاست میں تمہارا مقابلہ میں کروں گی، میرا چیلنج ہے کہ تم میدان میں آؤ۔ عثمان ڈار کی والدہ نے کہا کہ دیکھوں میں سیاسی میدان میں تمہارے شیر کا کیا حشر کرتی ہوں۔ انہوں نے کہا کہ میرا پہلے بھی ویڈیو پیغام تھا کہ میں عمران خان کے ساتھ کھڑی ہوں اور ڈٹی رہوں گی، سیاست میں نے نہیں چھوڑی، اب میدان میں آؤ اور دیکھو کیا ہوتا ہے