ورلڈ کپ کے لیے کرکٹ ٹیم کی رونمائی کر دی گئی ،سبرہلالی پرچم ہی جیتے گا،چیئرمین پی سی بی

لاہور(زور آور نیوز)پاکستان کرکٹ ٹیم کی ورلڈ کپ 2023 کے لیے کرکٹ کی رونمائی کردی گئی۔قذافی اسٹیڈیم لاہورمیں منعقدہ تقریب میں پاکستان کرکٹ بورڈ کی منیجمنٹ کمیٹی کے چیئرمین ذکا اشرف نیشرکت کی ، یہ تقریب اس بات کا اظہار ہے کہ پاکستان ٹیم آنے والے آئی سی سی ورلڈ کپ 2023 کے لیے پوری طرح تیار ہے۔تقریب سے خطاب کرتے ہوئے چیئرمین پی سی بی مینجمنٹ کمیٹی ذکا اشرف کا کہنا تھا آج ایک تاریخی لمحہ ہے ، ورلڈ کپ کرکٹ ٹیم کٹ کی رونمائی کر رہے ہیں، اس بار کٹ پر پاکستان کا سبز ہلالی پرچم ہے، پاکستان کرکٹ ٹیم کی کٹ کا نام سٹار نیشن جرسی رکھا گیا ہے ، ہم ون ڈے کرکٹ میں چیمپئن بن چکے ہیں، اللہ تعالی ایشیا کپ اور ورلڈ کپ میں کامیابی دے گا۔ذکا اشرف کا کہنا تھا ساری قوم کی دعائیں ٹیم کے ساتھ ہیں، اس شرٹ پر سبز ہلالی پرچم کی نسبت سبز رنگ ہے ، اس وقت ہماری ٹیم نمبر ون ٹیم ہے۔ پاکستان ورلڈ کپ ضرور جیتے گا انشاللہ۔ذکا اشرف نے کہا کہ سٹار نیشن جرسی سے دراصل ہمارے کرکٹرز اور جوشیلے شائقین ہر میچ میں ایک مضبوط تعلق سے جڑے رہیں گے، یہ جرسی ہماری کرکٹ کی شاندار روایات، ورثے اور روشن مستقبل کی عکاس ہے۔انہوں نے کہا کہ بی سی سی آئی کے صدر اور نائب صدر پاکستان آرہے ہیں، زمبابوے کرکٹ بورڈ کے سربراہ بھی پاکستان آئیں گے، ہم نے سب بورڈ سربراہان کو دعوت دی تھی، ہم روایتی مہمان نوازی کریں گے۔پاکستان کرکٹ بورڈ کے ڈائریکٹر کمرشل عثمان وحید کا کہنا ہے کہ یہ سٹار نیشن جرسی صرف ایک یونیفارم نہیں ہے بلکہ اس پر کامیابیاں، قربانیاں اور کہانیاں نمایاں ہیں۔انہوں نے کہا کہ اس کا ہر سٹار شائقین کی بھرپور حوصلہ افزائی اور ہمارے ہیروز کی روایات کو بیان کرتا ہے، اس میں ایک ایک نکتہ بڑی خوبی سے شامل کیا گیا ہے جس سے یہ ہر پاکستانی میں فخر کا احساس پیدا کرے گی۔