آدھی کوٹ کی نامور سماجی شخصیت انجینیئر…

خوشاب (راجہ نورالہی عاطف سے) آدھی کوٹ کی نامور سماجی شخصیت انجینیئر ملک طاہر ندیم بگھور نے کہا ہے کہ پنجابی ثقافت کو مختلف حوالوں سے ممتاز مقام حاصل ہے ۔ میڈیا سے خصوصی گفتگو کرتے ہوئے انہوں نے کہا کہ پنجاب وطن عزیز کا وہ صوبہ ہے جس کی ثقافت، تہواروں، کھانوں ،ملبوسات اور قدیم مقامات سمیت اپنے اندر ہزاروں رنگ سموئے ہوئے ہے ۔ ثقافتی، تاریخی، مذہبی اور جغرافیائی طور پر پنجاب اپنے اندر ہر وہ کشش رکھتا ہے جو ایک سیاح کو اپنی طرف کھینچ لے ، یعنی پنجاب میں تاریخی قلعے ہیں، دریا ہیں ،ریگستانی سلسلے ہیں، خوبصورت باغات ہیں ،پہاڑی سلسلے ہیں اور پنجاب اپنے صحت بخش اور مزیدار کھابوں کی وجہ سے بھی بہت مشہور ہے ۔ انہوں نے کہا کہ پنجاب کی سرزمین بہت سے سیاحتی مقامات کا گھر ہے ۔ انجینیئر ملک طاہر ندیم بگھور نے کہا کہ پنجاب کو پانچ دریاؤں کی سرزمین بھی کہا جاتا ہے ۔جہاں جہلم، چناب، راوی، پیاس اور ستلج نامی دریا بہتے ہیں ۔ انہوں نے کہا کہ پنجاب کے لوگ اپنے لہجے، فلسفے، شاعری، بلند حوصلے اور مضبوط عزم کے لیے جانے جاتے ہیں ۔ یہاں کی ثقافت کثیر رنگوں والی ہے۔ پنجاب کے لوگ مہمان نواز بھی بہت مشہور ہیں ۔پنجاب کے مختلف علاقوں میں سارا سال کسی نہ کسی طرح ثقافتی رونقیں لگی رہتی ہیں ۔