خوشاب (راجہ نورالہی عاطف سے) حکومت پنجاب کی ہدایت پر تحصیل نورپورتھل کے سرکاری سکولوں میں بھی ” پلانٹ فار پاکستان مہم” کے تحت موسم بہار کی شجرکاری مہم کا آغاز کر دیا گیا ۔گورنمنٹ ایلیمنٹری سکول ظفر آباد رنگپور بگھور میں منعقدہ افتتاحی تقریب میں ڈسٹرکٹ ایجوکیشن آفیسر ایلیمنٹری سکولز خوشاب فیض الحسن ملک اور ڈپٹی ڈسٹرکٹ ایجوکیشن آفیسر تحصیل نورپورتھل ڈاکٹر ملک منیر حسین کلو نے خصوصی طور پر شرکت کر کے پودے لگا کر شجرکاری مہم کا آغازکیا۔ اس موقع پر ڈی ای او فیض الحسن ملک اور ڈپٹی ڈی ای او ڈاکٹر ملک منیر حسین کلو کا کہنا تھا کہ حکومت پنجاب قومی شجرکاری مہم کو شاندار کامیابی سے ہمکنار کرنے کے لیے بھرپور اقدامات کر رہی ہے ۔
انہوں نے کہا کہ وطن عزیز پاکستان کو سرسبز و شاداب بنانے کے لیے ہمیں من حیث القوم اپنا بھرپور کردار ادا کرنا چاہیے۔ فیض الحسن ملک اور ڈاکٹر ملک منیر حسین کلو نے کہا کہ کسی بھی ملک کی مضبوط معیشت کے لیے اس کے کل رقبہ کے 25 فیصد حصہ پر جنگلات کا ہونا ضروری ہے ۔ انہوں نے اساتذہ کرام اور طلباء پر زور دیا کہ قومی شجرکاری مہم کو شاندار کامیابی سے ہمکنار کرنے کے لیے بڑھ چڑھ کر حصہ لیں۔ اس موقع پر ملک کو قوم کی تعمیر و ترقی اور خوشحالی کے لیے دعا بھی مانگی گئی ۔
Comments are closed.