ووٹر لسٹوں میں کتے کا رہائشی سرٹیفکیٹ منظرعام پر

ووٹر لسٹوں میں کتے کا رہائشی سرٹیفکیٹ منظرعام پر
فرضی کتے کے سرٹیفکیٹ نے بھارت کے انتخابی عمل پر سوالات اٹھا دیے

نئی دہلی

بھارتی ریاست بہار میں ووٹر لسٹوں کی خصوصی نظرثانی کے دوران ایک حیران کن واقعہ سامنے آیا جہاں ’ڈاگ بابو‘ نامی کتے کے نام پر رہائشی سرٹیفکیٹ جاری کردیا گیا۔

یہ انوکھا سرٹیفکیٹ سوشل میڈیا پر وائرل ہونے کے بعد تنازع کا باعث بن گیا جس کے نتیجے میں انتظامیہ نے اسے فوری طور پر منسوخ کردیا۔

سرٹیفکیٹ میں کتے کے والد کا نام ’کتا بابو‘ اور والدہ کا نام ’کتیا دیوی‘ درج تھا اور اس پر متعلقہ افسر کے دستخط بھی موجود تھے۔

تحقیقات سے انکشاف ہوا کہ اس فراڈ کے لیے دہلی کی ایک خاتون کے شناختی کارڈ سمیت دیگر نجی دستاویزات کا غلط استعمال کیا گیا۔

مقامی عدالت نے اس واقعے کو ’’انتہائی سنگین‘‘ قرار دیتے ہوئے ملوث افراد کے خلاف ایف آئی آر درج کرنے اور ان کی معطلی کا حکم دیا۔

یہ واقعہ اس وقت سامنے آیا جب بہار میں اپوزیشن جماعتیں ووٹر فہرستوں میں ردوبدل کو ووٹ کے حق پر سازش قرار دے رہی ہیں۔

اس تناظر میں فرضی کتے کے سرٹیفکیٹ نے انتخابی عمل پر سوالات اٹھا دیے ہیں۔

ضلعی انتظامیہ کا کہنا ہے کہ متعلقہ ملازمین اور افسران کے خلاف محکمانہ اور تادیبی کارروائی شروع کردی گئی ہے۔