دوحہ پر اسرائیلی حملے ریاستی دہشتگردی ہیں ، بھرپور جواب دیں گے ، وزیراعظم قطر

 دوحہ پر اسرائیلی حملے ریاستی دہشتگردی ہیں ، بھرپور جواب دیں گے ، وزیراعظم قطر

دوحہ

قطر کے وزیراعظم شیخ محمد بن عبدالرحمٰن الثانی نے کہا ہے کہ دوحہ پر اسرائیل کے حملے ریاستی دہشتگردی ہیں اور ان کا بھرپور جواب دیا جائے گا۔

اسرائیلی حملے کے بعد پہلی پریس کانفرنس کرتے ہوئے قطری وزیراعظم نے کہا کہ وہ اس واقعے کو کسی صورت نظرانداز نہیں کریں گے اور اسرائیل کے خلاف جواب دینے کا حق محفوظ رکھتے ہیں۔

ان کا کہنا تھا کہ محض بیانات اور مذمتوں سے آگے بڑھتے ہوئے ردعمل کے تمام ذرائع استعمال کیے جائیں گے، اس مقصد کے لیے ایک قانونی ٹیم بھی تشکیل دی جا رہی ہے تاکہ اسرائیل کو عالمی سطح پر جوابدہ ٹھہرایا جا سکے۔

انہوں نے کہا کہ خطہ ایک فیصلہ کن موڑ پر کھڑا ہے اور ایسے بربریت پر مبنی اقدامات کے خلاف اجتماعی ردعمل آنا چاہیے۔ ان کے مطابق اسرائیلی وزیراعظم خطے کو افراتفری کی طرف دھکیل رہے ہیں اور یہ واقعہ بھی اسی سلسلے کی کڑی ہے۔

شیخ محمد بن عبدالرحمٰن الثانی نے بتایا کہ یہ حملہ اس وقت کیا گیا جب حماس کی مذاکراتی ٹیم امریکی تجاویز پر بات چیت کر رہی تھی تاکہ غزہ میں جنگ بندی کے معاہدے تک پہنچا جا سکے، لیکن اسرائیل نے اس عمل کو سبوتاژ کر دیا۔

واضح رہے کہ اسرائیل نے گزشتہ روز دوحہ پر فضائی حملہ کرتے ہوئے حماس کی مرکزی قیادت کو نشانہ بنایا تھا۔