وفاقی محکموں سے برطرفیاں سنگین ناانصافی ہیں، ملازمین کو تحفظ دیا جائے ، شازیہ مری

وفاقی محکموں سے برطرفیاں سنگین ناانصافی ہیں، ملازمین کو تحفظ دیا جائے ، شازیہ مری

اسلام آباد

شمشاد مانگٹ

پاکستان پیپلز پارٹی پارلیمنٹرینز کی مرکزی ترجمان شازیہ مری نے وفاق کے مختلف محکموں خصوصاً اسپتالوں میں ڈاکٹرز، اساتذہ اور نرسوں کی برطرفی پر شدید تشویش کا اظہار کیا ہے۔

شازیہ مری کا کہنا ہے کہ 15 سے 20 سال تک خدمات انجام دینے والے ملازمین کو اچانک برطرف کرنا سنگین ناانصافی ہے۔ انہوں نے کہا کہ یہ ملازمین پمز، پولی کلینک اور وفاقی اسپتالوں کی ریڑھ کی ہڈی ہیں، جن میں سے قریب دو ہزار ملازمین گریڈ 16 اور 17 میں اپنی زندگی کے بہترین سال اداروں کو دے چکے ہیں۔

انہوں نے وضاحت کی کہ ان ملازمین کی تقرریاں کابینہ کی سب کمیٹی، جس کی سربراہی خورشید شاہ کر رہے تھے، کے ذریعے قانونی طور پر کی گئی تھیں، جبکہ سپریم کورٹ بھی اس حوالے سے واضح تحفظ دے چکی ہے، لہٰذا حکومت ان فیصلوں کی خلاف ورزی نہیں کر سکتی۔

پیپلز پارٹی ترجمان کے مطابق قومی اسمبلی کی قائمہ کمیٹی بھی فیصلہ دے چکی ہے کہ پارلیمان کے حتمی فیصلے تک کسی ملازم کے خلاف کوئی کارروائی نہ کی جائے۔ ان کے مطابق ملازمین کو برطرف کر کے پسندیدہ افراد کو بھرتی کرنا سیاسی انتقام کے مترادف ہے۔

شازیہ مری نے کہا کہ چیئرمین بلاول بھٹو زرداری نے ہمیشہ عوام کے معاشی حقوق کے لیے آواز بلند کی ہے اور پیپلز پارٹی متاثرہ ڈاکٹروں، نرسوں اور اساتذہ کے ساتھ ڈٹ کر کھڑی ہے۔

انہوں نے اعلان کیا کہ اگر ضرورت پڑی تو پیپلز پارٹی متاثرہ ملازمین کو مفت قانونی معاونت بھی فراہم کرے گی۔

انہوں نے حکومت سے مطالبہ کیا کہ یہ مسئلہ فوری طور پر حل کیا جائے اور ملازمین کی سروس، روزگار اور عزت کو تحفظ فراہم کیا جائے۔