کمپٹیشن کمیشن کا اسلامی یونیورسٹی میں آگاہی سیشن ، ای کامرس اور فِن ٹیک کے ریگولیٹری چیلنجز پر بحث

کمپٹیشن کمیشن کا اسلامی یونیورسٹی میں آگاہی سیشن ، ای کامرس اور فِن ٹیک کے ریگولیٹری چیلنجز پر بحث

سلمان امین کی قیادت میں سی سی پی کا فیصل مسجد کیمپس میں “کمپٹیشن قوانین” پر سیشن، قانونی تعلیم کے انضمام پر زور

اسلام آباد

شمشاد مانگٹ

کمپٹیشن کمیشن آف پاکستان (سی سی پی) نے اسلامی یونیورسٹی کے تعاون سے فیصل مسجد کیمپس میں “بدلتے معاشی و ڈیجیٹل منظرنامے میں کمپٹیشن قوانین” پر ایک اہم آگاہی سیشن کا انعقاد کیا۔ اس سیشن میں ممبر سی سی پی، سلمان امین کی قیادت میں کمیشن کا وفد شریک ہوا، جس میں ماہرین اور فیکلٹی ممبران نے ای کامرس، فِن ٹیک، اور آن لائن پلیٹ فارمز میں ریگولیشن کے چیلنجز پر تفصیل سے تبادلہ خیال کیا۔

ممبر سی سی پی، سلمان امین نے اپنے خطاب میں کہا کہ بدلتے ہوئے معاشی منظرنامے اور ڈیجیٹل پلیٹ فارمز کے بڑھتے ہوئے اثرات کے پیش نظر، کمپٹیشن کمیشن کی ذمہ داری اور کردار بڑھ گیا ہے۔ انہوں نے خاص طور پر ای کامرس، فِن ٹیک اور آن لائن پلیٹ فارمز کی بڑھتی ہوئی مقبولیت کو مدنظر رکھتے ہوئے ان کے ریگولیٹری چیلنجز کو اجاگر کیا، جن پر کمیشن کی جانب سے مسلسل نگرانی کی ضرورت ہے۔

کمپٹیشن قوانین کا ذکر کرتے ہوئے سلمان امین نے کہا کہ یہ قوانین کارٹلز اور اجارہ داری کی روک تھام میں اہم کردار ادا کرتے ہیں۔ انہوں نے واضح کیا کہ ان قوانین کا مقصد مارکیٹ میں آزادانہ مقابلہ کو فروغ دینا ہے تاکہ صارفین کو بہتر خدمات اور قیمتیں فراہم کی جا سکیں۔

سیشن میں فیکلٹی ممبران نے بھی اپنے خیالات کا اظہار کیا اور کہا کہ یہ ضروری ہے کہ ریگولیٹری چیلنجز سے قانونی تعلیم کو جوڑا جائے تاکہ نئے معاشی ماحول میں پیدا ہونے والے مسائل کا مؤثر حل تلاش کیا جا سکے۔ فیکلٹی نے کمپٹیشن قوانین کی بہتر تفہیم اور ان کے عملی اطلاق پر زور دیا، تاکہ طلباء اور قانون ساز دونوں ان قوانین کی اہمیت کو سمجھ سکیں۔

اس سیشن کا مقصد اسلامی یونیورسٹی کے طلباء اور فیکلٹی ممبران کو کمپٹیشن قوانین کی جدید تفصیلات سے آگاہ کرنا تھا اور ان میں آگاہی پیدا کرنا تھا کہ کیسے ان قوانین کا اطلاق موجودہ ڈیجیٹل اور معاشی چیلنجز کے ساتھ کیا جا رہا ہے۔