سیکیورٹی فورسز کا کامیاب آپریشن ، ٹانک میں 8 بھارتی حمایت یافتہ دہشت گرد ہلاک

سیکیورٹی فورسز کا کامیاب آپریشن ، خیبرپختونخوا کے ضلع ٹانک میں 8 بھارتی حمایت یافتہ دہشت گرد ہلاک

راولپنڈی

شمشاد مانگٹ

سیکیورٹی فورسز نے خیبرپختونخوا کے ضلع ٹانک میں ایک کامیاب کارروائی کے دوران 8 بھارتی حمایت یافتہ خارجی دہشت گردوں کو ہلاکش کر دیا۔ پاک فوج کے شعبہ تعلقات عامہ (آئی ایس پی آر) کے مطابق 24 اکتوبر 2025 کو سیکیورٹی فورسز نے بھارتی پراکسی فتنہ الخوارج کی موجودگی کی اطلاع پر انٹیلی جنس کی بنیاد پر ایک آپریشن کیا۔ اس آپریشن میں خوارج کے ٹھکانوں کو مؤثر طریقے سے نشانہ بنایا گیا اور شدید فائرنگ کے تبادلے میں 8 دہشت گرد ہلاک ہو گئے۔

آئی ایس پی آر نے مزید بتایا کہ ہلاک ہونے والے خوارج کے قبضے سے اسلحہ اور گولہ بارود بھی برآمد ہوا، جو سیکیورٹی فورسز اور قانون نافذ کرنے والے اداروں کے خلاف متعدد دہشت گردی کی کارروائیوں میں استعمال کیا گیا تھا۔ یہ دہشت گرد معصوم شہریوں کے قتل میں بھی ملوث تھے۔ آئی ایس پی آر کے مطابق علاقے میں کلیئرنس آپریشن جاری ہے تاکہ کسی بھی باقی ماندہ دہشت گرد کو ختم کیا جا سکے۔

آئی ایس پی آر نے کہا کہ سیکیورٹی فورسز اور قانون نافذ کرنے والے ادارے وفاقی ایپکس کمیٹی کی جانب سے منظور شدہ قومی ایکشن پلان کے تحت اپنے انسدادِ دہشت گردی اقدامات کو پوری قوت کے ساتھ جاری رکھیں گے۔ اس کے تحت پاکستان کی حکومت نے اپنے وژن ‘عزمِ استحکام’ کے تحت بیرونی حمایت یافتہ دہشت گردی کے خلاف فیصلہ کن کارروائیاں شروع کر رکھی ہیں۔

اس کارروائی پر وزیراعظم محمد شہباز شریف نے سیکیورٹی فورسز کو خراج تحسین پیش کیا اور کہا کہ “ہم ملکی سالمیت کو نقصان پہنچانے کے خواہش مند عناصر کے مذموم عزائم کو خاک میں ملا دیں گے۔” وزیراعظم نے اس عزم کا اعادہ کیا کہ پاکستان اپنے اندرونی استحکام کو یقینی بنانے کے لیے دہشت گردوں کے خلاف ہر سطح پر کارروائیاں جاری رکھے گا۔

اس سے قبل لکی مروت میں سیکیورٹی فورسز کے ایک اور آپریشن میں 8 دہشت گرد ہلاک اور 5 دہشت گرد شدید زخمی ہو گئے تھے۔ سیکیورٹی ذرائع کے مطابق یہ کارروائی خفیہ اطلاع پر کی گئی تھی جس میں دہشت گردوں کو فرار ہونے کا کوئی موقع نہ ملا۔ علاقے میں ممکنہ دہشت گردوں کی موجودگی کے پیش نظر سرچ آپریشن بھی جاری ہے۔

یہ کارروائیاں پاکستان کی دہشت گردی کے خلاف جاری مہم کا حصہ ہیں، جس کا مقصد نہ صرف ملکی سلامتی کو یقینی بنانا ہے بلکہ بیرونی قوتوں کے حمایت یافتہ دہشت گردوں کے نیٹ ورک کو مکمل طور پر ختم کرنا بھی ہے۔ سیکیورٹی فورسز کی جانب سے جاری یہ مہم پاکستان میں امن و استحکام کے لیے ایک اہم سنگ میل ثابت ہو رہی ہے۔