خیبر پختونخوا ، سیکورٹی فورسز کے دو کامیاب آپریشنز ، خوارج کا اہم رِنگ لیڈر سجاد عرف ابوذر سمیت 23 خوارج ہلاک
راولپنڈی
شمشاد مانگٹ
خیبر پختونخوا کے مختلف علاقوں میں 16 اور 17 نومبر کو ہونے والے دو بڑے کامیاب آپریشنز کے نتیجے میں 23 خوارج ہلاک ہو گئے ہیں۔ ان کارروائیوں کا مقصد بھارتی پراکسی نیٹ ورک کے دہشت گردوں کے خلاف کریک ڈاون کرنا تھا۔
پاک فوج کے شعبہ تعلقات عامہ (آئی ایس پی آر) کے مطابق پہلا آپریشن باجوڑ میں انٹیلی جنس کی بنیاد پر کیا گیا، جہاں سیکورٹی فورسز نے خوارج کے ٹھکانے کو موثر انداز میں نشانہ بنایا۔ اس آپریشن میں 11 خوارج ہلاک ہوئے، جن میں خوارج کا اہم رِنگ لیڈر سجاد عرف ابوذر بھی شامل تھا۔ سجاد ابوذر کا شمار ان افراد میں ہوتا تھا جو دہشت گردی کی مختلف کارروائیوں میں ملوث تھے۔
آئی ایس پی آر کے مطابق دوسرا آپریشن بنوں میں خفیہ اطلاعات کی بنیاد پر کیا گیا، جس میں 12 خوارج کو کامیابی سے ہدف بنایا گیا ۔ یہ کارروائیاں بھارتی پراکسی نیٹ ورک کو شدید نقصان پہنچانے میں کامیاب رہیں، جو علاقے میں دہشت گردی کی کارروائیوں کو فروغ دے رہا تھا۔
یہ آپریشنز “عزمِ استحکام” کے تحت انسداد دہشت گردی کی ملک گیر مہم کا حصہ ہیں، جو بھرپور طریقے سے جاری ہے۔ آئی ایس پی آر نے کہا کہ خوارج کی بڑھتی ہوئی سرگرمیوں کے پیش نظر، سیکورٹی فورسز کا فوری اور فیصلہ کن ردعمل دہشت گردوں کے نیٹ ورک کو موثر انداز میں کمزور کر رہا ہے۔
سیکورٹی فورسز نے اس بات پر زور دیا کہ علاقے میں مزید خطرات کے خاتمے کے لیے سینیٹائزیشن آپریشن مسلسل جاری ہیں، اور غیر ملکی سرپرستی یافتہ دہشت گردوں کے مکمل خاتمے تک کارروائیاں جاری رہیں گی۔
وفاقی ایپکس کمیٹی کی ہدایات کے مطابق ملک بھر میں دہشت گردی کے خاتمے تک انسداد دہشت گردی کی یہ مہم پوری رفتار سے جاری رکھی جائے گی۔
واضح رہے کہ پاکستان کی سیکورٹی فورسز نے اپنے عزم کا اعادہ کیا ہے کہ دہشت گردی کی روک تھام کے لیے کوئی کسر نہیں چھوڑیں گے اور ملک کی سالمیت کے دفاع میں اپنی مکمل قوت استعمال کریں گے
Comments are closed.