اے این ایف کی کاروائیاں ، منشیات اسمگلنگ کرنے کی بڑی کوشش ناکام ، 154.15 ملین ڈالر مالیت کی منشیات برآمد
اسلام آباد
شمشاد مانگٹ
اینٹی نارکوٹکس فورس نے مصدقہ انٹیلی جنس کی بنیاد پر کاروائی کرتے ہوئے، بین الاقوامی سطح پر کام کرنے والے منشیات اسمگلرز نیٹ ورک کے ذریعے، منشیات اسمگلنگ کرنے کی بڑی کوشش ناکام بنا دی- 154.15 ملین امریکی ڈالر مالیت کی منشیات بھاری مقدار میں برآمد کر لی گئیں ۔
اے این ایف انٹیلی جنس ٹیم پنجگور میں ڈرگ ٹریفکنگ تنظیم (ڈی ٹی او) کی مسلسل نگرانی کر رہی تھی، DTO کی سربراہی بدنام زمانہ اسمگلر علی جان کر رہا تھا ۔ یہ گروہ افغانستان سے آنے والی منشیات کو پنجگور سے تربت، گوادر اور پسنی کے راستے یمن، تنزانیہ اور جی سی سی ممالک تک سپیڈ بوٹس اور چھوٹی کشتیوں کے ذریعے اسمگل کرتا تھا ۔
این ایف کو اطلاع ملی کہ مذکورہ ڈی ٹی او بھاری مقدار میں منشیات ایل پی جی گیس کنٹینر ٹرک میں چھپا کر پنجگور سے تربت کے راستے گوادر/پسنی ساحل تک منتقل کرنے کا منصوبہ بنا رہاہے تا کہ منشیات کو سمندر کے راستے بیرونِ ملک بھجوایا جاسکے ۔
اے این ایف نے فوری کارروائی کرتے ہوئے مشکوک ایل پی جی گیس کنٹینر کو ایم-8 گوادر سی پیک روڈ پر سراغ لگا کر روکا اور قبضے میں لے لیا۔
ابتدائی پوچھ گچھ سے معلوم ہوا کہ کنٹینر میں بھاری مقدار میں منشیات چھپائی گئی ہیں- مکمل تلاشی کے دوران553.5
کلوگرام آئس (میتھ ایمفیٹامین) اور 40 کلو گرام ہیروئن برآمد کر لی گئ، جبکہ ڈی ٹی او کے دو کارندوں کوبھی گرفتار کر لیا گیا۔
اے این ایف نے نیٹ ورک کے دیگر اہم ساتھیوں، منشیات کے فراہم کنندہ اور مجوزہ وصول کنندہ کی گرفتاری کے لیے کوششیں تیز کر دی ہیں۔ گرفتار ملزمان کے خلاف مقدمہ درج کر لیا گیا ہے جبکہ سہولت کاروں اور دیگر ملوث افراد کی گرفتاری کے لیے چھاپے مارے جا رہے ہیں ۔
اے این ایف منشیات کے خلاف اپنی زیرو ٹالرنس پالیسی پر عمل پیرا ہے اور منظم ڈرگ نیٹ ورکس کے خاتمے کے لیے بھرپور کاروائیاں جاری رکھے گی
Comments are closed.