اے این ایف کی کارروائیاں ، بھاری مقدار میں منشیات برآمد ، 8 ملزمان گرفتار

اے این ایف کی کارروائیاں ، بھاری مقدار میں منشیات برآمد ، 8 ملزمان گرفتار ، مقدمات درج

راولپنڈی

شمشاد مانگٹ

اینٹی نارکوٹکس فورس (اے این ایف) نے ملک کے مختلف شہروں میں منشیات اسمگلنگ کے خلاف کریک  ڈاؤن کیا ،جس کے نتیجے میں 6 کاروائیوں کے دوران 8 ملزمان کو گرفتار کرلیا گیا ۔

ترجمان پولیس کے مطابق مختلف کاروائیوں میں16 کروڑ 28 لاکھ روپے سے زائد مالیت کی 255.020 کلو گرام منشیات برآمد کی گئیں ۔ تفصیلات کے مطابق کراچی انٹرنیشنل ائیرپورٹ پر بحرین جانے والے مسافر کے سامان سے 8.350 کلو آئس برآمد ہوئیں جبکہ اسلام آباد انٹرنیشنل ائیرپورٹ پر بحرین جانیوالے مسافر کے ٹرالی بیگ سے 520 گرام ہیروئن اور 550 گرام آئس برآمد ۔

ترجمان نے مزید بتایا کہ اقبال شہید ٹول پلازہ، جی ٹی روڈ، اٹک کے قریب ٹرک سے 14 کلو گرام چرس برآمد کرکے 3 ملزمان کو گرفتار کرلیا گیا جبکہ فیض آباد اسلام آباد کے قریب موٹر سائیکل سوار 2 ملزمان سے 3.6 کلو چرس برآمد کی گئیں ۔

ترجمان پولیس کے مطابق الآصف سکوائر، سہراب گوٹھ، کراچی کے قریب ملزم کے قبضے سے 2 کلو چرس برآمد ہوئی جبکہ چمن کے علاقے کلی دامن کے قریب اسمگلنگ کے لیے چھپائی گئی 226 کلو مارفین برآمد ہوئی ۔

ترجمان کا کہنا ہے کہ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے ۔