اے این ایف کا ملک کے مختلف شہروں میں منشیات اسمگلنگ کے خلاف کریک ڈاؤن ، غیرملکی خاتون سمیت 7 گرفتار

اے این ایف کا ملک کے مختلف شہروں میں منشیات اسمگلنگ کے خلاف کریک ڈاؤن ، غیرملکی خاتون سمیت 7 گرفتار

راولپنڈی

ولی الرحمن

اینٹی نارکوٹیکس ایجنسی (اے این ایف) نے ملک کے مختلف شہروں میں منشیات اسمگلنگ کے خلاف کریک ڈاؤن کیا ہے جس کے نتیجے میں 5 خواتین بشمول برطانوی نژاد پاکستانی خاتون سمیت 7 ملزمان کو گرفتار کرلیا گیا ہے ۔

تفصیلات کے مطابق اے این ایف نے ملک بھر میں منشیات سسمگلروں کیخلاف اپنی کارروائیاں تیز کردی ہیں ، مختلف کاروائیوں میں 2 کروڑ 79 لاکھ روپے سے زائد مالیت کی 113.690 کلو گرام منشیات برآمد ۔

ترجمان اے این ایف کے مطابق اسلام آباد انٹرنیشنل ائیرپورٹ پر مانچسٹر جانے والی برطانوی نژاد پاکستانی خاتون کے سامان سے 1.032 کلو ہیروئن برآمد کی گئی جبکہ علامہ اقبال انٹرنیشنل ایئرپورٹ پر کارگو آفس میں آسٹریلیا بھیجے جانے والے پارسل میں جذب شدہ 20.430 کلو آئس برآمد ہوئی ۔

اسی طرح ایک اور کارروائی میں کراچی میں واقع کوریئر آفس میں لاہور بھیجے جانے والے پارسل سے 2.646 کلو ویڈ ، روہڑی سکھر میں واقع کوریئر آفس میں گوجرانولہ بھیجے جانے والے پارسل سے600 گرام ہیروئن اور 500 گرام آئس ، انڈس ہائی وے پر کوہاٹ کے قریب 2 خواتین کے قبضے سے 9.6 کلو چرس برآمد کی گئی ۔

پولیس رپورٹ کے مطابق ترکئی ٹول پلازہ جہلم کے قریب خاتون کے قبضے سے 182 گرام ہیروئن اور 500 گرام آئس برآمد کرکے ملزمہ کو گرفتارکرلیاگیا۔

اسلام آباد موٹروے ٹول پلازہ کے قریب گاڑی سے 4 کلو ہیروئن اور 9 کلو آئس برآمد ہوئی اور خاتون سمیت 2 ملزمان کو گرفتار کرلیا گیا۔

آر سی ڈی روڈ وِندر کے قریب گاڑی کے خفیہ خانوں سے 4 کلو ویڈ برآمد کی گئی اور ملزم  کو حراست میں لیا گیا  ، اسی طرح خیبر کے غیرآباد علاقے شاہ کس میں اسمگلنگ کے لۓ چھپائی گئی 61.2 کلو چرس برآمد کی گئی ۔

پولیس ترجمان نے بتایا کہ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے ۔