وزیراعظم آزاد کشمیر چوہدری انوار الحق کا استعفیٰ دینے کے لیے شرط عائد

وزیراعظم آزاد کشمیر چوہدری انوار الحق کا استعفیٰ دینے کے لیے شرط عائد

مظفرآباد

وزیراعظم آزاد کشمیر چوہدری انوار الحق نے وزارتِ عظمیٰ سے استعفیٰ دینے کے لیے ایک شرط عائد کر دی ہے۔ ذرائع کے مطابق، وزیراعظم نے حامی وزراء اور اراکین اسمبلی کے لیے ترقیاتی فنڈز اور جاری منصوبوں کی گارنٹی مانگ لی ہے۔

چوہدری انوار الحق کا کہنا ہے کہ اگر وہ استعفیٰ دیتے ہیں تو مسلم لیگ (ن) کے وزراء اور ٹکٹ ہولڈرز کو آئندہ عام انتخابات سے پہلے برابری کی بنیاد پر ترقیاتی فنڈز دیے جائیں ۔ وزیراعظم نے اس شرط پر زور دیتے ہوئے کہا کہ ان کے حامی اراکین کو سیاسی اور مالی تحفظ فراہم کیا جائے، تاکہ ان کی حمایت برقرار رہ سکے۔

واضح رہے کہ وزیراعظم چوہدری انوار الحق کے خلاف مسلم لیگ (ن) اور پیپلز پارٹی کی جانب سے تحریکِ عدم اعتماد کی تیاری کی جا رہی ہے۔ ذرائع کے مطابق، پیپلز پارٹی کو تحریکِ عدم اعتماد کے لیے 36 ارکان کی حمایت حاصل ہو چکی ہے، جس کے باعث چوہدری انوار الحق کی حکومت کے لیے مشکلات بڑھتی جا رہی ہیں۔

اس صورتحال کے باوجود، چوہدری انوار الحق نے استعفیٰ دینے سے انکار کرتے ہوئے کہا ہے کہ اگر اپوزیشن کے پاس مطلوبہ نمبرز ہیں تو وہ تحریکِ عدم اعتماد پیش کریں۔ انہوں نے مزید کہا کہ وہ کسی بھی دباؤ میں آ کر استعفیٰ نہیں دیں گے اور اگر اپوزیشن نے اپنے دعووں کو ثابت کیا تو وہ فیصلہ کرنے پر مجبور ہوں گے۔

اس وقت آزاد کشمیر کی سیاسی صورتحال کشیدہ ہے، اور دونوں بڑی جماعتیں مسلم لیگ (ن) اور پیپلز پارٹی وزیراعظم کے خلاف طاقتور سیاسی اتحاد بنا چکی ہیں۔ تاہم، چوہدری انوار الحق کی جانب سے استعفیٰ دینے کی شرط نے سیاسی ہلچل مزید بڑھا دی ہے اور صورتحال کا فیصلہ آئندہ چند دنوں میں متوقع ہے