کم عمر اور بغیر لائسنس ڈرائیورز کے خلاف کریک ڈاؤن

لاہور (زورآور نیوز) کم عمر اور بغیر لائسنس ڈرائیورز کے خلاف کریک ڈاؤن جاری ہے۔سی ٹی او مستنصر فیروز کا کہنا ہے کہ بغیر لائسنس گاڑی،موٹرسائیکل چلانے والے کسی رعائت کے مستحق نہیں۔ کم عمر بچوں کو گاڑی، موٹرسائیکل دینے والے بھی کسی معافی مستحق نہیں۔انہوں نے مزید بتایا کہ 15 روز میں 05 ہزار 485 مقدمات درج،گاڑیاں تھانوں میں بند کی گئیں۔بغیر لائسنس 10 روز میں 05 ہزار 196 ڈرائیورز کے خلاف مقدمات درج کیے گئے۔ بغیر لائسنس کار ڈرائیونگ پر 1576 جبکہ بغیر موٹرسائیکل چلانے پر 3620 مقدمات درج کیے گئے۔سی ٹی او لاہور نے کہا کہ والدین اپنے بچوں کے مستقبل کے خود ذمہ دار ہیں۔ کریمنل ریکارڈ بننے سے سرکاری نوکری اور ویزہ حصول میں مشکلات آسکتی ہیں۔جب کہ ایڈیشنل آئی جی ٹریفک پنجاب مرزا فاران بیگ نے صوبہ بھر میں ہیلمٹ نہ پہننے والوں اور بغیر لائسنس کے گاڑی چلانے والوں کے خلاف کارروائی جاری رکھنے کی ہدایت کی ہے ۔ انہوں نے کہا کہ لاہور سمیت صوبہ بھر ہیلمٹ نہ پہننے والوں کے خلاف کارروائی کا سلسلہ جاری ہے ، رواں سال 4جولائی سے شروع ہونے والی ہیلمٹ کمپین میں ٹریفک پولیس پنجاب نے 22لاکھ 65 ہزار سے زائد چلان کیے۔ہیلمٹ نہ پہننے والوں کے پاس کاغذات پورے نہ ہونے پر 12 لاکھ 34 ہزار سے زائد موٹر سائیکلوں کو بند کروادیا گیا ۔ رواں سال بغیر لائسنس کے گاڑی چلانے والوں کے خلاف ٹریفک پولیس نے 8لاکھ سے زائد گاڑیوں کے چالان کیے ۔ بغیر لائسنس کے گاڑی چلانے والوں کے خلاف کارروائی کرتے ہوئے 1 لاکھ 53 سے زائد گاڑیوں کو بند کیا گیا ۔ مرزا فاران بیگ نے کہا کہ ٹریفک پولیس پنجاب بلاامتیاز قانون شکنی کرنے والوں کے خلاف کارروائی جاری رکھے گی ، ہمارا مقصد چلان نہیں آپ کی زندگیوں کو تحفظ فراہم کرنا ہے ۔