اسلام آباد، راولپنڈی کے درمیان جدید ریل سروس کا فیصلہ

اسلام آباد، راولپنڈی کے درمیان جدید ریل سروس کا فیصلہ

اسلام آباد

شمشاد مانگٹ

اسلام آباد اورراولپنڈی کے شہریوں کے لیے خوشخبری، جڑواں شہروں کے درمیان جدید اور تیز رفتار ٹرین چلانے کا فیصلہ کر لیا گیا۔ اس منصوبے کے تحت اسلام آباد مارگلہ اسٹیشن سے راولپنڈی صدر اسٹیشن تک سفر صرف 20 منٹ میں طے ہو گا، جس سے نہ صرف وقت اور ایندھن کی بچت ہوگی بلکہ سڑکوں پر ٹریفک کے دباؤ میں بھی واضح کمی آئے گی۔

اہم اجلاس وزیر داخلہ محسن نقوی اور وزیر ریلوے حنیف عباسی کی زیر صدارت منعقد ہوا، جبکہ وزیر مملکت برائے داخلہ طلال چوہدری بھی شریک ہوئے۔ اجلاس میں فیصلہ کیا گیا کہ منصوبے کا فریم ورک ایگریمنٹ آئندہ ہفتے حتمی شکل دے کر اس پر دستخط کر دیے جائیں گے۔

اجلاس میں وفاقی سیکرٹری داخلہ، سیکرٹری ریلوے، چیئرمین سی ڈی اے، کمشنر راولپنڈی، آئی جی اسلام آباد پولیس، ڈپٹی کمشنر اسلام آباد اور دیگر اعلیٰ افسران نے بھی شرکت کی۔

اجلاس میں کئے گئے فیصلوں کے مطابق ٹریک کی فراہمی وزارت ریلوے کرے گی ۔ ریل سروس کا انتظام سی ڈی اے سنبھالے گی جبکہ منصوبے کے لیے جدید اور آرام دہ ٹرینیں درآمد کی جائیں گی ۔

وزیر ریلوے حنیف عباسی نے کہا کہ یہ منصوبہ عوامی فلاح کا بہترین اقدام ہے جس سے شہری جڑواں شہروں کے درمیان تیز، آسان اور محفوظ سفر کر سکیں گے۔

وزیر داخلہ محسن نقوی نے کہا کہ یہ منصوبہ وزیراعظم شہباز شریف کے عوامی ریلیف ویژن کا عکاس ہے اور اس کی تکمیل سے ہزاروں شہری جدید اور معیاری سفری سہولت حاصل کریں گے۔

وزیر مملکت طلال چوہدری نے کہا کہ ٹرین سروس کم خرچ اور تیز رفتار سہولت فراہم کرے گی اور سڑکوں پر ٹریفک کا بوجھ نمایاں طور پر کم ہوگا۔