اسلام آباد میں غیر مقیم افغان باشندوں کا جعلی شناختی کارڈ سکینڈل : تھانہ گولڑہ کے اہلکاروں کا مبینہ تعاون

اسلام آباد میں غیر مقیم افغان باشندوں کا جعلی شناختی کارڈ سکینڈل : تھانہ گولڑہ کے اہلکاروں کا مبینہ تعاون

اسلام آباد

شمشاد مانگٹ

اسلام آباد کے تھانہ گولڑہ کی حدود میں غیر مقیم افغان باشندوں کے پاس جعلی قومی شناختی کارڈ ہونے کا انکشاف ہوا ہے، جس نے مقامی عوام میں شدید تشویش پیدا کر دی ہے۔ ذرائع کے مطابق گولڑہ اسٹیشن کے قریب مسجد قبا کی گلی میں قائم کریانہ سٹور کے مالک کریم خان اور ان کے بیٹے شہزاد، عثمان، سلیم اور نعمان غیر مقیم افغان شہری ہیں جنہیں مبینہ طور پر جعلی شناختی کارڈ جاری کیے گئے ہیں۔

اہلِ علاقہ کا کہنا ہے کہ یہ افراد نہ صرف دکانیں کھول کر کاروبار کر رہے ہیں بلکہ یہ سرعام یہ دعویٰ بھی کرتے ہیں کہ تھانہ گولڑہ کے اہلکار ان کے ساتھ ملے ہوئے ہیں، اور ان کے خلاف کسی بھی قانونی کارروائی کا امکان نہیں ہے۔ اس صورتحال نے مقامی پاکستانی شہریوں کے لیے تشویش کی نئی لہر پیدا کر دی ہے کیونکہ وہ محسوس کرتے ہیں کہ غیر مقیم افغان باشندے کھلے عام اپنے اثر و رسوخ کا مظاہرہ کر رہے ہیں اور پاکستانی شہری ان کے سامنے بے بس ہیں۔

مقامی شہریوں کا کہنا ہے کہ ان غیر مقیم افغان باشندوں کو مبینہ طور پر بعض کرپٹ پولیس افسران کی مکمل حمایت حاصل ہے، جس کی وجہ سے وہ قانون سے بالاتر ہو کر آزادانہ طور پر اپنے کاروبار چلانے اور اپنے اثر و رسوخ کا استعمال کر رہے ہیں۔ علاقے کے رہائشیوں نے یہ بھی کہا کہ کئی بار شکایات کے باوجود پولیس نے کوئی کارروائی نہیں کی، جس سے ان کے اندر مزید اضطراب پیدا ہو رہا ہے۔

شہریوں نے آئی جی اسلام آباد سے فوری نوٹس لینے کی درخواست کی ہے اور تھانہ گولڑہ میں غیر مقیم افغان باشندوں کے سرپرست اہلکاروں کے خلاف سخت کارروائی کا مطالبہ کیا ہے۔ علاقہ مکینوں کا کہنا ہے کہ اگر یہ صورتحال یونہی برقرار رہی تو وہ اپنے ہی ملک میں غیر محفوظ محسوس کرنے لگیں گے۔

واضح رہے کہ یہ معاملہ نہ صرف مقامی سطح پر عوامی اعتماد کی کمی کا سبب بن رہا ہے بلکہ پولیس کے کردار پر بھی سوالات اٹھا رہا ہے۔ اگر جلد کارروائی نہ کی گئی تو یہ صورتحال مزید پیچیدہ ہو سکتی ہے، اور اس سے پاکستان کے داخلی امن و سکون پر بھی منفی اثرات مرتب ہو سکتے ہیں۔

شہریوں کی توقع ہے کہ اسلام آباد کی پولیس فورس اس معاملے کی فوری تحقیقات کرے گی اور قانون کی عملداری کو یقینی بنانے کے لیے سخت اقدامات اٹھائے گی تاکہ عوام کو اس صورتِ حال سے نجات مل سکے۔