فرخ حبیب کی پریس کانفرنس،گھساپٹا بیانیہ ہے ،پی ٹی آئی

لاہور(زورآور نیوز) کورکمیٹی پی ٹی آئی نے کہا ہے کہ فرخ حبیب کی پریس کانفرنس پی ٹی آئی کی سیاست ختم کے سلسلے کا حصہ ہے، چہرے اور انداز بدل کر گھِسا پِٹا سکرپٹ دہرانے سے عوام گمراہ نہیں ہوگی، بزورِ قوت پی ٹی آئی کو سیاسی عمل سے باہر کرنے کی کوششیں عوام میں مزید مقبولیت کی وجہ بن رہی ہے۔ ایکس پر جاری پاکستان تحریک انصاف کی کورکمیٹی کے اجلاس کے اعلامیہ میں کہا گیا کہ پاکستان تحریک انصاف کی کورکمیٹی نے جانب سے ضمیر کے قیدی چیئرمین عمران خان کو نشانۂ انتقام بنانے کیلئے تقاضہ ہائے انصاف کے قتل کی شدید مذمت کی۔کور کمیٹی نے کہا کہ چیرمین ہر لحاظ سے ماورائے آئین و قانون حربوں کی زد میں اور انصاف کے مفلوج نظام کے رحم و کرم پر ہیں، توشہ خانہ کے بعد سائفر مقدمے کی اب تک کی کارروائی نقائص سے بھرپور اور امتیازی و ناقص انصاف کی واضح مثال ہے، عدالتی کارروائی کے انداز سے صاف ظاہر ہورہا ہے کہ توشہ خانہ کیطرح عمران خان کو پہلے سے طے شدہ فیصلے کے ذریعے سزا سنانا ریاست کو مقصود ہے، نظامِ انصاف کی ظالمانہ حد تک تباہی اور عدالتوں کا کینگرو کورٹس کی زندہ مثالیں بن کر رہ جانا ریاست و سماج کیلئے نہایت مہلک اور ہیجان انگیز ہے، عدلیہ خصوصاً سپریم کورٹ آئین کے تحفّظ اور اس میں فراہم کردہ بنیادی حقوق کی حفاظت میں افسوسناک حد تک ناکام دکھائی دے رہی ہے۔
عدل و انصاف کے قیام کے بغیر پاکستان کو معاشی، سیاسی اور سماجی طور پر بحرانوں سے نکالنے کی کسی تدبیر کے کارگر ہونے کا کوئی امکان نہیں، دستور کو فیصلہ کن حیثیت دیکر اس کے نفاذ کو اوّلین فرض کے طور پر قبول کرکے ہی ریاست کسی درست سمت کا تعیّن کرسکتی ہے۔ چیف جسٹس آف پاکستان آئین سے انحراف اور ضمیر کے قیدی عمران خان کو ناقص ترین عدالتی کارروائی کے ذریعے بدترین سیاسی انتقام کا نشانہ بنائے جانے کا بلاتاخیر نوٹس لیں، اجلاس میں تحریک انصاف مغربی پنجاب کے صدر فرخ حبیب کی تین ہفتوں پر محیط جبری گمشدگی کے بعد پریس کانفرنس کا بھی جائزہ لیا گیا۔فرخ حبیب کی بازیابی خوش آئند، ان کی پریس کانفرنس تحریک انصاف کو سیاست سے بےدخل کرنے کے اسی ماورائے آئین و قانون سلسلے کا حصہ ہے جو پچھلے 17 ماہ سے جاری ہے، چہرے اور انداز بدل کر وہی گھِسا پِٹا سکرپٹ دہرانے سے قوم کو گمراہ کرنا ممکن ہے نہ سچ میں جھوٹ کی آمیزش ممکن ہوپائے گی، ماورائے آئین، قانون اور جمہوری ریاستی ہتھکنڈوں سے بزورِ قوت تحریک انصاف کو سیاسی عمل سے باہر کرنے کی کوششیں الحمد للہ تحریک کی مضبوطی اور عوام میں مقبولیت کی وجہ بن رہی ہیں۔