اسلام آباد ہائیکورٹ العزیزیہ اور ایون فیلڈ ریفرنس میں نواز شریف کی اپیل بحالی کی درخواست دائر

اسلام آباد ( زورآور نیوز) اسلام آباد ہائیکورٹ العزیزیہ اور ایون فیلڈ ریفرنس میں نواز شریف کی اپیل بحالی کی درخواست دائر کردی گئی۔ میڈیا رپورٹس کے مطابق اسلام اباد ہائیکورٹ میں امجد پرویز ایڈووکیٹ نے نواز شریف کی جانب سے اپیلیں بحال کرنے کی درخواستیں دائر کیں، اسلام آباد ہائیکورٹ میں درخواستیں ایسوسی ایٹ وکیل نواز چوہدری نے جمع کروائیں، درخواستوں میں استدعا کی گئی ہے کہ اپیلوں کو بحال کر کے میرٹ پر دلائل سننے کے بعد فیصلہ کیا جائے، جس کے لیے ایون فیلڈ اور العزیزیہ ریفرنس میں سزا کے خلاف اپیلیں بحال کرنے کی استدعا کی جاتی ہے۔بتایا جارہا ہے کہ سابق وزیر اعظم نواز شریف ایون فیلڈ اور العزیزیہ ریفرنس میں سزا یافتہ ہیں، احتساب عدالت نے نواز شریف کو 10 سال قید اور 80 لاکھ پاؤنڈ کی سزا سنائی تھا، العزیزیہ ریفرنس میں احتساب عدالت نے نواز شریف کو 7 سال قید کی سزا سنائی تھی، سابق وزیر اعظم نواز شریف کو 10 سال کیلئے عوامی عہدے کیلئے بھی نااہل قرار دیا گیا تھا، قائد ن لیگ ن ان سزاؤں کے خلاف اسلام آباد ہائیکورٹ سے رجوع کیا تھا۔معلوم ہوا ہے کہ اسلام آباد ہائیکورٹ کے 2 رکنی بنچ نے سابق وزیر اعظم نواز شریف کی اپیلوں پر سماعت کی، لندن میں قیام طویل ہونے پر اسلام آباد ہائیکورٹ نے جون 2021ء میں نواز شریف کی اپیلیں خارج کردی تھیں، جسٹس عامر فاروق اور جسٹس محسن اختر کیانی نے عدم پیروی پر نواز شریف کی اپیلیں خارج کی تھیں۔ خیال رہے کہ نواز شریف کی قانونی ٹیم نے ایون فیلڈ اور العزیزیہ ریفرنسز میں سزا کے خلاف اپیلیں بحال کرنے کی درخواست تیار کی تھی، جس پر قائد مسلم لیگ ن نے پاکستان پہنچنے کے بعد اسلام آباد ایئرپورٹ پر ایون فیلڈ اور العزیزیہ ریفرنسز میں سزا کے خلاف اپیلیں بحال کرنے کی درخواست پر دستخط کیے تھے۔