ایران کا اسرائیل پر شدید حملہ ، 24 اسرائیلی ہلاک ،86 زخمی

تہران

امریکا کی جانب سے ایرانی جوہری تنصیبات پر حملوں کے بعد ایران نے اسرائیل پر بھرپور جوابی کارروائی کرتے ہوئے میزائل برسادیے، جن کے نتیجے میں تل ابیب ایک بار پھر دھماکوں سے لرز اٹھا ۔

غیر ملکی میڈیا رپورٹس کے مطابق ایرانی حملے میں 24 اسرائیلی ہلاک جبکہ 86 افراد زخمی ہوئے ہیں جبکہ متعدد تنصیبات کو نقصان پہنچا ہے ، ان حملوں میں اسرائیلی فوج کی 14 تنصیبات کو کامیابی سے نشانہ بنایا گیا ، جن میں کمانڈ اینڈ کنٹرول سینٹرز، سپورٹ بیسز، بایولوجیکل ریسرچ سینٹرز شامل ہیں۔

بین الاقوامی میڈیا رپورٹس کے مطابق امریکی فضائیہ نے اپنے جدید ترین B-2 اسٹیلتھ بمبار طیاروں کے ذریعے ایران کے تین اہم ایٹمی مراکز— فردو، نطنز اور اصفہان—کو نشانہ بنایا۔ امریکی صدر نے دعویٰ کیا ہے کہ فردو کا ایٹمی پلانٹ مکمل طور پر تباہ کر دیا گیا ہے۔

ایران کی جانب سے اس حملے کو اعلانِ جنگ قرار دیا جا رہا ہے، ایرانی سرکاری ذرائع ابلاغ کے مطابق ایرانی حکومت نے امریکا کو خبردار کیا ہے کہ اگر خطے میں امریکی مفادات یا شہریوں کو کوئی نقصان پہنچا تو اس کے نتائج واشنگٹن کے لیے سنگین ہوں گے۔

ایرانی حکام کا کہنا ہے کہ اب خطے میں ہر امریکی فوجی اور شہری ایران کے لیے ’’ممکنہ ہدف‘‘ بن چکا ہے اور امریکا کے کسی بھی اقدام کا جواب بھرپور طاقت سے دیا جائے گا۔ ایران نے اس پیش رفت کے بعد اسرائیل پر کئی میزائل حملے کیے جن میں درمیانے فاصلے تک مار کرنے والے خیبر بیلسٹک میزائل بھی شامل ہیں۔