اسلام آباد ،  نئے گھریلو گیس کنکشن کے لیے درخواست دینے کا طریقہ کار سامنے آگیا

 نئے گھریلو گیس کنکشن کے لیے درخواست دینے کا طریقہ کار سامنے آگیا

گھریلو گیس کنکشن کی فیس کا تعین: سیکیورٹی ڈپازٹ، کنکشن فیس اور درخواست دینے کا طریقہ

اسلام آباد

شمشاد مانگٹ

سوئی نادرن گیس پائپ لائنز (ایس این جی پی ایل) نے نئے گھریلو گیس کنکشن کے لیے درخواست دینے کا طریقہ کار اور متعلقہ فیسوں کا اعلان کر دیا ہے۔

نئے گھریلو گیس کنکشن کی فیس ، سیکیورٹی ڈپازٹ  20,000 روپے ، 10 مرلے تک گھر کے لیے کنکشن فیس 21,000 روپے جبکہ  10 مرلے سے بڑے گھروں کے لیے کنکشن فیس 23,000 روپے  رکھی گئی ہے ۔

گھریلو صارفین اپنے قریبی سوئی نادرن گیس پائپ لائنز کے ریجنل آفس سے یا کمپنی کی آفیشل ویب سائٹ سے درخواست فارم ڈاؤن لوڈ کر کے حاصل کر سکتے ہیں۔ درخواست فارم کو بڑے حروف میں پُر کرنا ہوگا، اور نیٹ ورک کی دستیابی کی بنیاد پر درخواست کو منتخب کیا جائے گا۔

درخواست کے ساتھ  جمع ہونے والی ضروری دستاویزات میں  قومی شناختی کارڈ کی کاپی ، جائیداد کی ملکیت کا ثبوت اور ہمسایہ جائیداد کا گیس بل شامل ہے۔

آخر میں فارم اور تمام مطلوبہ کاغذات جمع کرانے کے بعد، ایس این جی پی ایل ٹیم درخواست دہندہ کے گھر کا معائنہ کرے گی تاکہ تکنیکی امکانات کا جائزہ لیا جا سکے۔ اگر درخواست منظور ہو جاتی ہے تو درخواست دہندہ کو پروپوزل لیٹر یا ڈیمانڈ نوٹس جاری کیا جائے گا جس میں انسٹالیشن کے رہنما اصول اور منظور شدہ کنٹریکٹرز کی فہرست شامل ہوگی۔

حکام کے مطابق یہ نیا اور آسان طریقہ کار گھریلو صارفین کو کم قیمت پر قدرتی گیس مہیا کرے گا، جس سے گیس کنکشن کے عمل کو مزید سادہ اور شفاف بنایا جائے گا۔