ملک ریاض کے گرد گھیرا تنگ ، 22 ارب روپے سے زائد کی منی لانڈرنگ کا الزام

ملک ریاض کے گرد گھیرا تنگ ، 22 ارب روپے سے زائد کی  منی لانڈرنگ کا الزام ، نیب نے شکایت درج کروا دیں

احتساب عدالت میں شکایت اینٹی منی لانڈرنگ ایکٹ 2010 کے تحت دائر کی گئی

راولپنڈی

نیب نے احتساب عدالت راولپنڈی میں ملک ریاض اور ان کے اہلِ خانہ پر 22 ارب روپے سے زائد کی مبینہ منی لانڈرنگ پر باضابطہ شکایت درج کروا دی ، جس میں کئی شخصیات اور اداروں کو نامزد کیا گیا ہے۔

شکایت احتساب عدالت راولپنڈی میں اینٹی منی لانڈرنگ ایکٹ 2010 کے تحت دائر کی گئی۔نیب کے مطابق رقم منی لانڈرنگ کے ذریعے بیرونِ ملک منتقل کی گئی پھر واپس لا کر کراچی میں بحریہ آئیکون ٹاور تعمیر کیا گیا۔

احتساب عدالت کے عملے نے شکایت اسکروٹنی کے لیے رکھ لی ہے، جو مکمل ہونے پر عدالت میں پیش کی جائے گی۔نیب کی شکایت میں ملک ریاض، ان کی اہلیہ بینا ریاض، بیٹے احمد علی ریاض اور بہو مبشرہ ریاض کو نامزد کیا گیا ہے۔

شکایت میں زین ملک، وقاص رفعت اور سلمان احمد خان کے نام بھی شامل ہیں۔اداروں میں بحریہ ٹاؤن پرائیویٹ لمیٹڈ اور گلیکسی کنسٹرکشن پرائیویٹ لمیٹڈ کو بطور فریق شامل کیا گیا ہے۔