یوم شہداء 15جولائی ، ٹکا کی شجرکاری مہم تقریب

یوم شہداء 15جولائی ، ترک ادارہ برائے تعاون و ہم آہنگی کی  شجرکاری مہم تقریب ، شہداء کے ناموں کے پودے لگائے گئے

اسلام آباد

شمشاد مانگٹ

ترکیہ کے یومِ جمہوریت و قومی یکجہتی (15 جولائی) کی مناسبت سے ترک ادارہ برائے تعاون و ہم آہنگی (ٹکا) نے اسلام آباد کے فاطمہ جناح (ایف نائن) پارک میں شجر کاری کی تقریب کا انعقاد کیا ۔

اس موقع پر دہشتگرد تنظیم ایف ای ٹی او کی طرف سے 2016 میں بغاوت کی ناکام کوشش کو روکنے میں شہید ہونے والے 253 افراد کے ناموں کے پودے لگائے گئے ۔
تقریب میں جمہوریہ ترکیہ کے اسلام آباد میں سفیر عرفان نذیروغلو، وفاقی سیکریٹری برائے قانون و انصاف نعیم اکبر راجہ، حکومتی عہدیداران، سول سوسائٹی کے نمائندوں، ترک اداروں کے اراکین اور شہریوں نے شرکت کی۔

ترک ادارہ برائے تعاون و ہم آہنگی ( ٹکا) پاکستان کی کوآرڈینیٹر صالحہ تُنا نے تقریب کی علامتی اہمیت کو اجاگر کرنے کے ساتھ ساتھ شہداء کو خراجِ عقیدت پیش کیا۔۔ انہوں نے ترکیہ اور پاکستان کے درمیان دیرینہ دوستی کو بھی سراہا ۔
سفیر عرفان نذیروغلو نے 2016 کی بغاوت کے دوران اپنی خدمات کو یاد کیا، پاکستان کی مخلصانہ حمایت پر شکریہ ادا کیا اور شہداء کو خراجِ عقیدت پیش کیا ۔
کیپیٹل ڈیولپمنٹ اتھارٹی کے تعاون سے منقعدہ تقریب جمہوری اقدار اور ترکیہ و پاکستان کے مضبوط برادرانہ تعلقات کی جیتی جاگتی علامت بن گئی ۔