یومِ بحریہ ، آپریشن دوارکا کی یاد، پاک بحریہ کی جرات و بہادری کو قوم کا سلام

یومِ بحریہ ، آپریشن دوارکا کی یاد، پاک بحریہ کی جرات و بہادری کو قوم کا سلام

صدر آصف علی زرداری کا یومِ بحریہ پر پیغام، پاک بحریہ کو قربانیوں اور خدمات پر خراج تحسین

کراچی

ملک بھر میں آج یومِ بحریہ ملی جوش و جذبے کے ساتھ منایا جا رہا ہے۔ یہ دن پاک بحریہ کی بہادری، قربانیوں اور تاریخی کارناموں کو یاد کرنے اور خراجِ تحسین پیش کرنے کے لیے منایا جاتا ہے۔

6 ستمبر 1965 کو بھارت نے رات کی تاریکی میں پاکستان پر حملہ کیا تو پاک افواج نے ہر محاذ پر دشمن کو منہ توڑ جواب دیا۔ اسی جنگ کے دوران پاک بحریہ نے 8 ستمبر کو بھارتی دفاعی قلعہ تصور کیے جانے والے دوارکا ریڈار اسٹیشن پر تاریخی حملہ کیا۔

کراچی سے تقریباً 350 کلو میٹر دور دوارکا کا ریڈار اسٹیشن بھارتی فضائیہ کو مدد فراہم کر رہا تھا۔ پاک بحریہ کے 7 جنگی جہاز ریڈیو سگنلز کے بغیر دشمن کی حدود میں داخل ہوئے اور دوارکا کے مقام پر توپوں کے دہانے کھول دیے۔ صرف چند منٹوں میں 50،50 راؤنڈز فائر کیے گئے اور بھارتی ریڈار اسٹیشن مکمل طور پر تباہ کر دیا گیا۔

آپریشن دوارکا نہ صرف پاک بحریہ کی پیشہ ورانہ صلاحیت کا مظہر ہے بلکہ پاکستان کی عسکری تاریخ کا ایک سنہری باب بھی ہے۔

یومِ بحریہ کے موقع پر صدر آصف علی زرداری نے اپنے خصوصی پیغام میں کہا کہ 1965 کی جنگ میں پاک بحریہ نے جرات و بہادری کی نئی تاریخ رقم کی۔ انہوں نے کہا کہ آپریشن سومناتھ دشمن کے لیے خوف اور پاک بحریہ کے لیے فخر کی علامت بن گیا۔

صدر نے کہا کہ آج کی پاک بحریہ ایک جدید اور کثیرالجہتی فورس کے طور پر نہ صرف سمندری حدود کا تحفظ کر رہی ہے بلکہ تجارتی راستوں کی حفاظت اور عالمی امن مشنز میں بھی اہم کردار ادا کر رہی ہے۔

انہوں نے مزید کہا کہ بُنیان المرصوص آپریشن کے دوران پاک بحریہ نے سمندری سرحدوں کا دفاع کرتے ہوئے دشمن کی جارحیت کو ناکام بنایا، جس پر پوری قوم کو اپنے شہداء اور غازیوں پر فخر ہے۔

صدر نے کہا کہ یومِ بحریہ اس عزم کی تجدید ہے کہ پاک بحریہ ہر محاذ پر قوم کے دفاع کے لیے ہمہ وقت تیار ہے۔