او جی ڈی سی ایل کا بلوچستان میں جھل مگسی ڈویلپمنٹ پراجیکٹ مکمل

او جی ڈی سی ایل کا بلوچستان میں جھل مگسی ڈویلپمنٹ پراجیکٹ مکمل

بلوچستان کے دور دراز ضلع میں توانائی کی پیداوار اور کمیونٹی ڈویلپمنٹ کے متعدد منصوبے بھی شروع۔ ترجمان او جی ڈی سی ایل

اسلام آباد

شمشاد مانگٹ

وزیرِاعظم محمد شہباز شریف کی ہدایات پربلوچستان کے ضلع جھل مگسی کی تیز رفتار ترقی کے سلسلے میں آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے تیل و گیس پر مشتمل جھل مگسی ڈویلپمنٹ پراجیکٹ کی کامیاب تکمیل اور افتتاح کا اعلان کر دیا ہے۔

اس کے ساتھ ہی کمپنی نے بلوچستان کے اس دور افتادہ ضلع میں متعدد سماجی ترقی (سی ایس آر) کے منصوبے بھی شروع کیے ہیں۔ یہ منصوبہ حکومتِ پاکستان کی جانب سے منظور شدہ خصوصی مراعات کے تحت ریکارڈ مدت میں مکمل کیا گیا۔

تفصیلات کے مطابق جھل مگسی تیل وگیس فیلڈ سے اس وقت یومیہ14 ملین اسٹینڈرڈ کیوبک فٹ گیس اور45 بیرل یومیہ کنڈنسیٹ پیدا ہو رہا ہے۔ یہ گیس سوئی سدرن گیس کمپنی لمیٹڈ (ایس ایس جی سی ایل) کے نیٹ ورک میں شامل کی گئی ہے، جس کے لیے کمپنی نے جھل مگسی فیلڈ سے 98 کلومیٹر طویل نئی پائپ لائن بچھائی۔

حکومتِ پاکستان کے1997 پیٹرولیم پالیسی سے مارجنل فیلڈ گیس پرائسنگ پالیسی میں تبدیلی اور دیگر مراعات کی منظوری کے بعد اس پراجیکٹ پر فروری 2024 میں کا م شروع کیا گیا۔ قومی توانائی کی ضروریات کو پورا کرنے کے لیے اس منصوبے کو ترجیحی بنیادوں پر رکھا گیا اور مختلف تکنیکی و علاقائی مشکلات کے باوجود ریکارڈ مدت میں مکمل کیا گیا۔

منصوبے میں ایمین یونٹ، ڈیہائیڈریشن یونٹ، ہاٹ آئل پیکیج، پاور جنریشن سہولیات اور گیدرنگ سسٹم شامل ہیں۔ جھل مگسی فیلڈ میں دو کنویں شامل ہیں اور یہ ایک مشترکہ منصوبہ ہے جس کا آپریٹر او جی ڈی سی ایل ہے، جو56 فیصد ورکنگ انٹرسٹ رکھتا ہے۔

پاکستان آئل فیلڈز لمیٹڈ (POL) کے پاس 24 فیصد جبکہ گورنمنٹ ہولڈنگز پرائیویٹ لمیٹڈ (GHPL) کے پاس20 فیصدحصہ ہے۔

واضع رہے اس کے علاوہ او جی ڈی سی ایل نے مقامی آبادی کی فلاح کے لیے متعدد کارپوریٹ سماجی ذمہ داری (سی ایس آر) کے منصوبے بھی شروع کیے ہیں، جن میں او جی ڈی سی ایل گرامر اسکول، انڈس اسپتال کے تعاون سے ماں اور بچے کے لیے ہیلتھ کیئر سہولت،بے گھرافراد کیلئے 84 کلائمیٹ ریزیلینٹ مکانات کی تعمیر، مقامی طلباء کیلئے سکھر آئی بی اے میں چار سالہ مکمل فنڈڈ اسکالرشپس، نیووٹیک کے ذریعے 55 نوجوانوں کی فنی تربیت کے علاوہ صحت اور بنیادی سہولیات کے شعبے میں مقامی اسپتالوں کیلئے دو ایمبولینسز، سالانہ مفت آئی کیمپس کا انعقاد، 800 خاندانوں میں راشن بیگزکی تقسیم، صاف پانی کی فراہمی کے لیے دوآر او پلانٹس اور زیر زمین واٹر ٹینکس، مقامی ثقافت اور کھیلوں کے فروغ کے لیے جھل مگسی ڈیزرٹ ریلی کی اسپانسرشپ شامل ہیں۔

جھل مگسی ڈویلپمنٹ پراجیکٹ کی کامیاب تکمیل اور او جی ڈی سی ایل کے سماجی اقدامات اس بات کا ثبوت ہیں کہ کمپنی قومی توانائی کے تحفظ کے ساتھ ساتھ مقامی آبادی کی فلاح و بہبود کے لیے بھی پرعزم ہے۔

یہ تمام اقدامات وزیرِاعظم محمد شہباز شریف کی ہدایات کے عین مطابق ہیں تاکہ دور دراز علاقوں میں ترقی کو تیز کیا جا سکے اور مقامی آبادی قومی وسائل کے ثمرات سے براہِ راست مستفید ہو۔