راولپنڈی بار ایسوسی ایشن کا کچہری چوک وائڈننگ منصوبے پر شدید تحفظات ، وکلاء کے چیمبرز کے تحفظ کے لیے تحریک شروع کرنے کی دھمکی

راولپنڈی بار ایسوسی ایشن کا کچہری چوک وائڈننگ منصوبے پر شدید تحفظات ، وکلاء کے چیمبرز کے تحفظ کے لیے تحریک شروع کرنے کی دھمکی

راولپنڈی

شمشاد مانگٹ

راولپنڈی بار ایسوسی ایشن نے کچہری چوک کے وائڈننگ اینڈ ری ماڈلنگ منصوبے پر شدید اعتراض کرتے ہوئے اعلان کیا ہے کہ وکلاء کے چیمبرز اور ان کے معاشی مفادات پر کسی بھی صورت میں سمجھوتہ نہیں کیا جائے گا۔ ڈسٹرکٹ بار ایسوسی ایشن راولپنڈی نے اس منصوبے کے حوالے سے اپنے موقف کا اظہار کرتے ہوئے ارباب اقتدار اور دیگر سٹیک ہولڈرز سے مطالبہ کیا کہ وہ اپنے وعدوں کی پاسداری کریں اور اس بات کو یقینی بنائیں کہ وکلاء کے چیمبرز کو کسی بھی صورت میں نقصان نہ پہنچے۔

بار ایسوسی ایشن نے ایک جنرل باڈی اجلاس میں اپنے خدشات کا اظہار کیا جس کی صدارت صدر سردار منظر بشیر خان نے کی۔ اجلاس میں ہائی کورٹ بار، راولپنڈی بینچ، پنجاب بار کونسل کے ممبران، سابق و موجودہ صدور، سیکریٹریز، سینئر وکلاء اور لیڈی لائرز نے بھرپور شرکت کی اور اس عزم کا اعادہ کیا کہ پوری وکلاء برادری ڈسٹرکٹ بار کی پشت پر کھڑی ہے۔ وکلاء کے حقوق کے تحفظ کے لیے ہر ممکن اقدام کیا جائے گا اور اس سلسلے میں کسی بھی قسم کی غفلت برداشت نہیں کی جائے گی۔

اجلاس میں کچہری چوک کے منصوبے کی موجودہ صورتحال پر تفصیل سے بات کی گئی اور بتایا گیا کہ اس منصوبے کے تحت پہلے طے شدہ نقشے کے مطابق وکلاء کے چیمبرز اور دکانوں کو کسی بھی قسم کا نقصان نہیں پہنچنا تھا۔ تاہم، حالیہ دنوں میں نئے نشانات لگانے کی کوشش کی گئی جس کی وجہ سے حمزہ بلاک اور ایگزیکٹیو بلاک میں موجود چیمبرز اور دکانوں کو شدید نقصان پہنچنے کا خدشہ ہے۔

ڈسٹرکٹ بار ایسوسی ایشن نے اس بات پر زور دیا کہ ان کے چیمبرز اور دیگر اثاثوں کو مزید نقصان نہیں ہونے دیا جائے گا اور اس سلسلے میں تمام آپشنز پر غور کیا جائے گا۔ بار ایسوسی ایشن نے اس عزم کا اظہار کیا کہ اگر سٹیک ہولڈرز کی جانب سے وکلاء کے حقوق کے تحفظ کے حوالے سے کوئی سنجیدہ اقدامات نہیں کیے گئے تو وکلاء اپنے حقوق کے دفاع کے لیے ایک بھرپور تحریک شروع کریں گے۔

اجلاس میں اسلام آباد کچہری میں ہونے والے خودکش حملے کے شہداء، وانا میں کیڈٹ کالج پر ہونے والے حملے اور ڈسٹرکٹ بار ایسوسی ایشن کے سینئر ممبر چوہدری نصیر احمد طاہر کے حادثے میں شہادت پر افسوس کا اظہار کیا گیا۔ اجلاس میں شہداء کے لیے دعا کی گئی اور ان کے اہل خانہ کے ساتھ اظہار تعزیت کیا گیا۔

اجلاس میں ایک قرارداد پیش کی گئی جسے متفقہ طور پر منظور کیا گیا۔ قرارداد میں بار ایسوسی ایشن نے حکومت اور متعلقہ اداروں سے مطالبہ کیا کہ وکلاء کے حقوق کا تحفظ کیا جائے اور کسی بھی محکمانہ جارحیت یا مذاکرات کی ناکامی کی صورت میں دوبارہ جنرل باڈی اجلاس بلایا جائے گا۔ اجلاس کے اختتام پر بار ایسوسی ایشن نے اپنے وکلاء کے حقوق کے تحفظ کے لیے ہر ممکن اقدام اٹھانے کا اعلان کیا۔