راولپنڈی، تھانہ چونترہ کی حدود میں غیر قانونی ہاؤسنگ سوسائٹی میں فائرنگ، ایک شخص جاں بحق، تین زخمی

راولپنڈی، تھانہ چونترہ کی حدود میں غیر قانونی ہاؤسنگ سوسائٹی میں فائرنگ، ایک شخص جاں بحق، تین زخمی

عبداللہ سٹی میں سکیورٹی گارڈز کے روپ میں مسلح افراد کی فائرنگ، زمین کے تنازع پر خونریز جھڑپ

راولپنڈی

شمشاد مانگٹ

راولپنڈی کے نواحی علاقے چونترہ میں واقع ایک مبینہ غیر قانونی ہاؤسنگ سوسائٹی ‘عبداللہ سٹی’ میں زمین کے تنازع پر خوفناک واقعہ پیش آیا، جہاں سکیورٹی گارڈز کے روپ میں موجود مسلح افراد نے مقامی زمینداروں پر اندھا دھند فائرنگ کر دی، جس کے نتیجے میں ایک شخص جاں بحق اور تین شدید زخمی ہو گئے۔

ذرائع کے مطابق متاثرہ زمیندار اپنی زمینوں پر فصل کی بوائی کے لیے موجود تھے، جب عبداللہ سٹی کے مسلح سکیورٹی گارڈز نے ان پر جدید اسلحے سے حملہ کر دیا۔ مقامی افراد کا کہنا ہے کہ مذکورہ زمین پر ہاؤسنگ سوسائٹی نے ناجائز قبضہ کر رکھا تھا، اور جب زمیندار اپنے آبائی حق کے تحت زمین پر آئے تو ان پر وحشیانہ فائرنگ کی گئی۔

عینی شاہدین کے مطابق، حملہ آور سکیورٹی گارڈز کی وردی میں ملبوس تھے، تاہم ان کے رویے اور انداز سے اندازہ ہوتا ہے کہ وہ پناہ گزین جرائم پیشہ یا غیر مقامی افراد تھے، جو سوسائٹی کی آڑ میں علاقے میں سرگرم ہیں۔

فائرنگ کے بعد علاقہ بھر میں شدید خوف و ہراس پھیل گیا، اور مقامی لوگ اپنے گھروں میں محصور ہو گئے۔ واقعے کے فوری بعد پولیس کی بھاری نفری موقع پر پہنچ گئی اور تحقیقات کا آغاز کر دیا گیا ہے۔ جاں بحق اور زخمی افراد کو ریسکیو 1122 کی مدد سے قریبی ہسپتال منتقل کر دیا گیا ہے۔

پولیس ذرائع کے مطابق، واقعے کی نوعیت انتہائی سنگین ہے، اور تمام پہلوؤں سے تفتیش جاری ہے، بشمول یہ کہ آیا حملہ آوروں کا تعلق کسی جرائم پیشہ گروہ یا لینڈ مافیا سے ہے۔

علاقہ مکینوں اور مقامی زمینداروں نے حکومت اور قانون نافذ کرنے والے اداروں سے مطالبہ کیا ہے کہ غیر قانونی ہاؤسنگ سوسائٹیوں کے خلاف سخت کارروائی کی جائے اور زمینوں پر قبضے کے ذریعے دہشت گردی پھیلانے والے عناصر کو فوری گرفتار کر کے کڑی سزا دی جائے۔

یہ واقعہ نہ صرف ایک سنجیدہ قانون و امن کا مسئلہ ہے، بلکہ عوام کے جان و مال کے تحفظ کے حوالے سے بھی سوالات کھڑا کرتا ہے۔ ضرورت اس امر کی ہے کہ ریاستی ادارے فوری اور مؤثر ایکشن لیں تاکہ ایسے واقعات کی روک تھام ممکن ہو سکے۔