صائمہ قریشی کا دوٹوک مؤقف ،95 فیصد مرد دوسری شادی چاہتے ہیں، نکاح کریں ، حرام سے بچیں

صائمہ قریشی کا دوٹوک مؤقف ،95 فیصد مرد دوسری شادی چاہتے ہیں، نکاح کریں ، حرام سے بچیں

کراچی

معروف اداکارہ صائمہ قریشی نے کہا ہے کہ مردوں کو غیر ازدواجی تعلقات کے بجائے نکاح کو ترجیح دینی چاہیے کیونکہ ان کے مطابق 95 فیصد مرد دوسری شادی کے خواہاں ہوتے ہیں۔ انہوں نے زور دیا کہ افیئرز اور خفیہ تعلقات معاشرے اور نسلوں کو تباہ کر سکتے ہیں۔

اداکارہ نے حال ہی میں ایف ایچ ایم پوڈکاسٹ میں شرکت کے دوران اپنی گفتگو میں ایک بار پھر مردوں کی دوسری شادی کے حق میں اپنا مؤقف دہرایا۔ ان کا کہنا تھا کہ اگر کسی مرد کو افیئرز رکھنے کا شوق ہے تو بہتر ہے کہ وہ کسی عورت کی ذمہ داری قبول کرے اور نکاح کرے، بجائے اس کے کہ وہ گناہ کا راستہ اختیار کرے۔

صائمہ قریشی نے کہا کہ ایک مرد کی غلطی صرف ایک فرد کو نہیں بلکہ پورے خاندان اور نسل کو متاثر کر سکتی ہے۔ ان کا کہنا تھا کہ اگر کوئی مرد کسی عورت کے جذبات سے کھیلتا ہے یا جھوٹے خواب دکھاتا ہے، تو اسے یہ سوچنا چاہیے کہ اس کی اپنی اولاد بھی بڑی ہو رہی ہے۔

انہوں نے مزید کہا کہ جب مرد غیر شرعی تعلقات قائم کرتے ہیں تب تو وہ نہیں ڈرتے، لیکن اگر نکاح کے ذریعے ایک جائز رشتہ قائم کریں اور بیوی کو اعتماد میں لیں تو یہ کہیں بہتر ہے۔

صائمہ قریشی نے دعویٰ کیا کہ انہوں نے خود ایسے کئی مرد دیکھے ہیں جو اپنی دونوں بیویوں کو ساتھ رکھتے ہیں اور خوشگوار زندگی گزار رہے ہیں۔ ان کے مطابق شریعت میں دوسری شادی کے لیے پہلی بیوی کی اجازت لینا لازم نہیں، تاہم اسے آگاہ کرنا ضروری ہے۔

اداکارہ نے مزید انکشاف کیا کہ بہت سی ایسی خواتین بھی موجود ہیں جو اپنی شوہروں کی دوسری شادی میں خود رضا مند ہوتی ہیں، اور ایسی مثالیں میڈیا اور سماج میں دیکھنے کو ملتی ہیں۔

یاد رہے کہ فروری 2025 میں بھی صائمہ قریشی نے اسی پوڈکاسٹ میں گفتگو کرتے ہوئے کہا تھا کہ مردوں کو دوسری شادی کے لیے پہلی بیوی کی اجازت کی ضرورت نہیں ہے، اور غیر ازدواجی تعلقات سے بہتر ہے کہ نکاح کیا جائے۔