خضدار: سیکیورٹی فورسز کا زہری میں کامیاب آپریشن، فتنۃ الہندوستان کے 14 دہشت گرد ہلاک اور 20 سے زائد زخمی

خضدار: سیکیورٹی فورسز کا زہری میں کامیاب آپریشن، فتنۃ الہندوستان کے 14 دہشت گرد ہلاک اور 20 سے زائد زخمی

راولپنڈی

بلوچستان کے ضلع خضدار کے علاقے زہری میں سیکیورٹی فورسز نے ایک انٹیلی جنس بیسڈ آپریشن کے دوران بھارتی سرپرستی کی مبینہ دہشت گرد تنظیم فتنۃ الہندوستان کے خلاف کارروائی کرتے ہوئے 14 دہشت گردوں کو ہلاک اور 20 سے زائد کو زخمی کر دیا۔

پاک فوج کے شعبہ تعلقات عامہ (آئی ایس پی آر)  کے مطابق فتنۃ الہندوستان کے عناصر زہری کے پرامن شہریوں کو ہراساں کرنے کی سازش میں تھے جسے فورسز نے بروقت معلومات کی بنیاد پر ناکام بنا دیا۔

ترجمان کے مطابق آپریشن کے دوران دہشت گردوں کے متعدد ٹھکانے تباہ کیے گئے اور منظرِ عمل سے بڑی مقدار میں اسلحہ و گولہ بارود اور ممکنہ دھماکا خیز مواد برآمد کر لیا گیا۔ مقامی عوام نے فورسز کی کارروائی کا خیرمقدم کرتے ہوئے پاک فوج کے حق میں نعرے لگائے اور دہشت گردوں کے خاتمے پر اطمینان کا اظہار کیا۔

ترجمان نے مزید بتایا کہ سیکیورٹی اداروں نے عوامی تحفظ کو یقینی بنانے کے عزم کا اعادہ کیا اور کہا کہ فتنۃ الہندوستان اور دیگر مسلح عناصر کے خلاف آپریشنز جاری رہیں گے۔ واضح رہے کہ یکم اکتوبر کو ضلع شیرانی میں بھی انٹیلیجنس بیسڈ کارروائی میں مبینہ بھارتی حمایت یافتہ فتنۃ الخوارج کے 7 افراد ہلاک ہوئے تھے جن کے قبضے سے اسلحہ اور دھماکا خیز مواد برآمد ہوا تھا جبکہ علاقے میں صفائی اور سینیٹائزیشن آپریشن جاری ہے۔