سید علی شاہ گیلانی کی جدوجہد کشمیری عوام کے لیے مشعلِ راہ ہے: صدر مملکت

سید علی شاہ گیلانی کی جدوجہد کشمیری عوام کے لیے مشعلِ راہ ہے ، صدر مملکت

اسلام آباد

صدرِ پاکستان آصف علی زرداری نے کشمیری حریت رہنما سید علی شاہ گیلانی کی چوتھی برسی کے موقع پر اپنے پیغام میں کہا ہے کہ سید علی شاہ گیلانی نے اپنی پوری زندگی کشمیری عوام کے حقِ خودارادیت کی جدوجہد کے لیے وقف کر دی۔

انہوں نے کہا کہ گیلانی کی زندگی قربانی، جرات اور ثابت قدمی کی علامت ہے اور اُن کا عزم کشمیری عوام کے لیے مشعلِ راہ ہے۔

صدر مملکت نے کہا کہ بھارتی ظلم و ستم سید علی شاہ گیلانی کے حوصلے کو متزلزل نہ کر سکا اور ان کے مؤقف نے کشمیری عوام کو آزادی کی جدوجہد پر ثابت قدم رکھا۔

انہوں نے کہا کہ پاکستان، سید علی شاہ گیلانی اور کشمیری عوام کی لازوال قربانیوں کو خراجِ تحسین پیش کرتا ہے اور کشمیری عوام کا مقدمہ ہر فورم پر اٹھاتا رہے گا۔

صدر زرداری نے مزید کہا کہ سید علی شاہ گیلانی کا لہو تحریکِ آزادی کو ہمیشہ زندہ رکھے گا۔

انہوں نے مطالبہ کیا کہ کشمیری عوام کو اقوامِ متحدہ کی قراردادوں کے مطابق حقِ خودارادیت دیا جائے۔ آخر میں صدرِ پاکستان نے دعا کی کہ اللہ تعالیٰ سید علی شاہ گیلانی کے درجات بلند فرمائے۔