پنجاب میں گندم کی کوئی قلت نہیں، آٹے کی قیمت نہیں بڑھنے دیں گے ، عظمیٰ بخاری

پنجاب میں گندم کی کوئی قلت نہیں، آٹے کی قیمت نہیں بڑھنے دیں گے ، عظمیٰ بخاری

فلور ملز مالکان کو تین دن کی مہلت، گندم کے ذخائر رجسٹر نہ کرانے پر کارروائی ہوگی

لاہور

صوبائی وزیر اطلاعات پنجاب عظمیٰ بخاری نے کہا ہے کہ پنجاب میں گندم کی کوئی قلت نہیں، سیلاب کے نام پر آٹے کی قیمت بڑھانے کی اجازت نہیں دی جائے گی۔

لاہور میں پریس کانفرنس کرتے ہوئے انہوں نے کہا کہ وزیراعلیٰ مریم نواز شریف گندم اور آٹے کی قیمتوں پر مسلسل فکرمند رہتی ہیں، کچھ عناصر قدرتی آفات کو منافع خوری کے لیے استعمال کرنا چاہتے ہیں مگر حکومت ان کے خلاف سخت کارروائی کرے گی۔

عظمیٰ بخاری نے فلور ملز مالکان اور آڑھتیوں کو وارننگ دیتے ہوئے کہا کہ تمام افراد کو تین دن کا وقت دیا جا رہا ہے کہ وہ اپنے گندم کے ذخائر رجسٹر کروائیں، بصورت دیگر قانون حرکت میں آئے گا۔ ان کا کہنا تھا کہ روٹی کی 14 روپے قیمت پر کوئی سمجھوتہ نہیں ہوگا۔

انہوں نے بتایا کہ خانیوال میں بروقت سرکاری گندم محفوظ نہ کرنے کے باعث وہ سیلابی پانی میں بہہ گئی، اس غفلت پر ڈی جی فوڈ خانیوال اور دیگر ذمہ دار عملے کو معطل کر دیا گیا ہے۔ ’’گندم کا ایک ایک دانہ عوام کی امانت ہے، جس کا حساب دینا ہوگا‘‘، انہوں نے کہا۔

صوبائی وزیر نے واضح کیا کہ حکومت نے گندم کی قیمت 3000 روپے اور روٹی کی قیمت 14 روپے مقرر کر رکھی ہے اور اس پر کسی قسم کا سمجھوتہ نہیں ہوگا۔

پی ٹی آئی پر تنقید کرتے ہوئے ان کا کہنا تھا کہ انتخابی بائیکاٹ ڈرامہ ثابت ہوا، اگر بائیکاٹ کرنا تھا تو بیلٹ پیپر پر نام کیوں چھپوایا؟ ن لیگ کیلئے یہ اعزاز کی بات ہے کہ رانا ثناء اللہ بھاری اکثریت سے سینیٹر منتخب ہوں گے۔

انہوں نے مزید کہا کہ صحافی طیب بلوچ پر حملے سے ثابت ہو گیا کہ پی ٹی آئی سیاسی جماعت نہیں بلکہ فساد پھیلانے والی پارٹی ہے، ایسی حرکتیں کسی سیاسی جماعت کو زیب نہیں دیتیں۔