20 اپریل 2025 کو شیخوپورہ کے علاقے گوجرانوالہ روڈ، شیش محل بند کے قریب ایک افسوسناک حادثہ پیش آیا جہاں اینٹوں سے لدی تیز رفتار ٹریکٹر ٹرالی کی زد میں آ کر ایک 14 سالہ موٹرسائیکل سوار لڑکا جان کی بازی ہار گیا۔ ریسکیو 1122 شیخوپورہ کے مطابق حادثہ اس وقت پیش آیا جب لڑکا موٹرسائیکل پر جا رہا تھا اور اچانک ٹریکٹر ٹرالی کی زد میں آ گیا، جو اینٹیں لے کر جا رہی تھی۔ اطلاع ملتے ہی ریسکیو 1122 کی امدادی ٹیمیں فوری طور پر موقع پر پہنچیں لیکن لڑکا موقع پر ہی دم توڑ چکا تھا۔ جاں بحق لڑکے کی شناخت زکریا ولد جاوید، سکنہ جوہر ٹاؤن، کے طور پر ہوئی ہے۔ ریسکیو اہلکاروں نے فوری طور پر مقامی پولیس (تھانہ B ڈویژن) کو اطلاع دی اور لاش کو قانونی کارروائی کے لیے ان کے حوالے کیا۔ اس افسوسناک واقعے کے بعد علاقے میں افسردگی کی فضا چھا گئی۔ ریسکیو 1122 کے میڈیا کوآرڈینیٹر رانا ہارون علی کے مطابق عوام کو سڑکوں پر احتیاط کی تلقین کی گئی ہے تاکہ مستقبل میں ایسے جان لیوا حادثات سے بچا جا سکے۔
Comments are closed.