شجاعت کی پرویز کو ق میں آنے کی پیشکش

لاہور ( سپیشل رپورٹر) چوہدری شجاعت سے ملاقات کے بعد پرویز الہیٰ کی ق لیگ میں واپسی کی خبریں گردش کرنے لگیں تاہم چوہدری پرویز الہیٰ کے صاحبزادے مونس الہیٰ نے اس کی تردید کر دی۔صدر مسلم لیگ ق چوہدری شجاعت حسین نے صدر پی ٹی آئی چوہدری پرویز الٰہی سے ملاقات کی،چوہدری شجاعت نے پرویز الٰہی کی خیریت دریافت کی۔ کیمپ جیل میں ایک گھنٹے تک جاری رہنے والی ملاقات میں مختلف امور پر بات چیت کی گئی۔ملاقات میں چوہدری شجاعت کے صاحبزادے سالک حسین بھی شریک ہوئے۔اے آر وائی نیوز کی رپورٹ کے مطابق چوہدری شجاعت نے پرویز الہیٰ کو تحریک انصاف چھوڑ کر خاندان میں واپس آنے کی دعوت دی ہے۔انہوں نے کہا کہ آپ واپس آ جائیں توموجودہ معاملات بہتر ہو سکتے ہیں۔چوہدری پرویز الہیٰ نے فی الحال پی ٹی آئی چھوڑنے سے انکار کر دیا۔رپورٹ کے مطابق پرویز الہیٰ کو یہ بھی واضح کیا گیا کہ ان کے خلاف قائم کیے گئے مقدمات میں خاندان کے کسی فرد کا عمل دخل نہیں۔اسی طرح مونس الہیٰ نے بھی پرویز الہیٰ کی ق لیگ میں واپسی کے امکان کو مسترد کر دیا۔مونس الہیٰ نے کہا کہ چوہدری پرویز الہیٰ تحریک انصاف میں ہیں اور مضبوطی سے کھڑے ہیں۔ قبل ازیں سابق وفاقی وزیر مونس الہیٰ نے کہا کہ میرے والد کو ان کے وکیلوں سے نہیں ملنے دیا جا رہا،میری والدہ کو بھی ملاقات کی اجازت نہیں مل رہی ہے۔ آج آئی جی جیل خانہ جات خود چوہدری شجاعت صاحب اور ان کے بیٹے چوہدری سالک حسین کو لے کر ملوانے گئے ہیں۔ مونس الہیٰ نے کہا کہ اب یہ ہمیں جواب دیں گے کہ اس ہفتے کی ملاقات خاندان والوں کی ہم نے کروا دی ہے۔ مونس الہیٰ یہ بھی دعوی کر چکے ہیں کہ پرویز الٰہی کا میڈیکل ریکارڈ منگوانے والے ڈاکٹر کو عہدے سے ہٹا دیا گیا۔