’’ گڈ ٹو سی یو آل مائی فرینڈز‘‘،چیف جسٹس کا کیس میں وکلاء سے مکالمہ،بندیال کل ریٹائرڈ

اسلام آباد (ظفر ملک) ’’ گڈ ٹو سی یو آل مائی فرینڈز‘‘،چیف جسٹس کا کیس میں وکلاء سے مکالمہ۔ تفصیلات سپریم کورٹ میں چیف جسٹس پاکستان جسٹس عمر عطاء بندیال کا ریٹائرمنٹ سے قبل کورٹ روم میں آخری دن ہے،چیف جسٹس نے آج 8 مقدمات کی سماعت کی۔ جسٹس محمد علی مظہر اور جسٹس عائشہ ملک بھی بینچ میں شامل تھے۔ چیف جسٹس نے وکلاء اور صحافیوں کا شکریہ ادا کیا۔چیف جسٹس نے آخری کیس میں وکلاء سے مکالمہ کیا کہ ’’ گڈ ٹو سی یو آل مائی فرینڈز‘‘۔ وکیل میاں بلال نے کہا کہ جب ہائیکورٹ میں آپ کا پہلا کیس تھا تو بھی میں ہی آپ کے سامنے پیش ہوا۔ آج سپریم کورٹ میں آپ کا آخری کیس ہے تب بھی پیش ہو رہا ہوں۔ چیف جسٹس عمر عطاء بندیال نے مکالمہ کیا کہ آپ کا کیس تو غیر مؤثر ہو گیا ہے۔وکیل میاں بلال نے کہا کہ آپ نے ہمیشہ تحمل سے سنا۔ چیف جسٹس نے ریمارکس دئیے کہ ہمارا فریضہ ہے سب کو تحمل سے سنیں،کالا کوٹ پہن کر ہم خود کو بار کا حصہ سمجھتے ہیں۔ جسٹس ساحر تو کہا کرتے تھے کہ بار ہماری ماں ہے،ان شاء اللہ بار روم میں ملیں گے۔ چیف جسٹس نے ریمارکس دئیے کہ میڈیا کے ساتھیوں کا بھی شکریہ جنہوں نے مجھے متحرک رکھا،میڈیا کی تنقید کو ویلکم کرتے ہیں۔میڈیا فیصلوں پر تنقید ضرور کرے لیکن ججز پر نہ کرے،تنقید کے جواب میں ججز اپنا دفاع نہیں کر سکتے۔ جج پر تنقید سے پہلے یہ ضرور دیکھیں گے فیصلہ سچ پر مبنی ہے یا قیاس آرائیوں پر۔ چیف جسٹس پاکستان نے مزید ریمارکس دئیے کہ ججز پر تنقید جھوٹ کی بنیاد پر نہیں ہونی چاہیے،اللہ تعالٰی کا شکر گزار ہوں جس نے مجھ سے ملک اور انصاف کی خدمت لی۔ یاد رہے کہ چیف جسٹس عمر عطاء بندیال کل اپنی آئینی مدت مکمل ہونے پر عہدے سے ریٹائرڈ ہو جائیں گے۔