پاکستان فلسطینی عوام کے ساتھ کھڑا ہے، حقِ خود ارادیت کی حمایت جاری رہے گی ، عاصم افتخار

پاکستان فلسطینی عوام کے ساتھ کھڑا ہے، حقِ خود ارادیت کی حمایت جاری رہے گی ، عاصم افتخار

نیو یارک اعلامیہ کی توثیق، اسرائیلی جارحیت کی شدید مذمت

نیویارک

اقوام متحدہ میں پاکستان کے مستقل مندوب سفیر عاصم افتخار احمد نے کہا ہے کہ فلسطینی عوام کو حقِ خود ارادیت حاصل ہے اور پاکستان ہر سطح پر ان کے ساتھ کھڑا ہے۔

انہوں نے بتایا کہ پاکستان نے فلسطین کے مسئلے کے پرامن حل اور دو ریاستی فارمولے سے متعلق “نیو یارک اعلامیہ” کے حق میں ووٹ دیا ہے۔ یہ اعلامیہ 28 تا 30 جولائی 2025 نیویارک میں منعقدہ اعلیٰ سطحی بین الاقوامی کانفرنس کے نتیجے میں منظور کیا گیا۔

پاکستانی مندوب کے مطابق اس اقدام کے ذریعے پاکستان نے فلسطین پر اپنی دیرینہ اور اصولی پوزیشن دہرا دی۔ پاکستان کا مؤقف ہے کہ فلسطینی عوام کو ایک آزاد، قابل عمل اور متصل ریاست قائم کرنے کا حق ہے جس کی سرحدیں 1967 سے پہلے کی بنیاد پر ہوں اور جس کا دارالحکومت القدس الشریف ہو۔ یہ مؤقف اقوام متحدہ کی قراردادوں اور بین الاقوامی قوانین کے عین مطابق ہے۔

سفیر عاصم افتخار نے کہا کہ “نیو یارک اعلامیہ” کی توثیق پاکستان کے اس عزم کو اجاگر کرتی ہے کہ وہ ہمیشہ ایک منصفانہ اور پائیدار امن کے قیام کے لیے پرعزم رہا ہے۔

پاکستان نے اس موقع پر غزہ میں جاری اسرائیلی جارحیت کی بھی شدید مذمت کی ہے جس کے نتیجے میں 64 ہزار سے زائد بے گناہ فلسطینی جاں بحق ہو چکے ہیں۔ پاکستان نے عالمی برادری پر زور دیا کہ وہ فلسطینی عوام کے حق میں آواز بلند کرے اور خطے میں منصفانہ امن کے لیے عملی اقدامات کرے۔