اے این ایف کا ملک گیر کریک ڈاؤن ، 225 کلو منشیات برآمد، 6 ملزمان گرفتار

اے این ایف کا ملک گیر کریک ڈاؤن ، 225 کلو منشیات برآمد، 6 ملزمان گرفتار

راولپنڈی

شمشاد مانگٹ

اینٹی نارکوٹکس فورس (اے این ایف) نے منشیات فروشوں کے خلاف ملک گیر کریک ڈاؤن کے دوران پانچ کامیاب کارروائیاں کرتے ہوئے دو خواتین سمیت چھ ملزمان کو گرفتار کر لیا، جبکہ 225 کلوگرام سے زائد منشیات برآمد کی گئی جن کی مالیت ایک کروڑ 74 لاکھ روپے سے زائد بتائی جاتی ہے۔

اے این ایف ترجمان کے مطابق کارروائیاں تعلیمی اداروں کے اطراف اور مختلف شہروں میں کی گئیں تاکہ نوجوانوں خصوصاً طلباء کو منشیات کے زہر سے محفوظ رکھا جا سکے۔

پہلی کارروائی میں جڑانوالہ موٹروے ٹول پلازہ فیصل آباد کے قریب ایک گاڑی سے 500 گرام ویڈ (بھنگ) اور 200 گرام آئس برآمد کی گئی۔ گرفتار ملزم نے دورانِ تفتیش انکشاف کیا کہ وہ منشیات تعلیمی اداروں کے طلباء کو فروخت کرتا تھا۔

دوسری کارروائی میں ترکئی ٹول پلازہ کے قریب ایک گاڑی سے 33.6 کلوگرام چرس برآمد کی گئی جبکہ دو ملزمان کو گرفتار کیا گیا۔

تیسری کارروائی اسلام آباد موٹروے ٹول پلازہ پر کی گئی، جہاں بس میں سوار دو خواتین مسافروں کے قبضے سے 9.6 کلوگرام چرس برآمد ہوئی۔

چوتھی کارروائی حیات آباد ٹول پلازہ لنک روڈ پشاور کے قریب عمل میں لائی گئی جہاں ایک ملزم کے قبضے سے 1.1 کلوگرام افیون برآمد کی گئی۔

پانچویں کارروائی میں شاکس جمرود کے علاقے سے جھاڑیوں میں چھپائی گئی 180 کلوگرام چرس برآمد کی گئی۔

ترجمان اے این ایف کے مطابق تمام کارروائیاں انسدادِ منشیات ایکٹ 1997 کے تحت کی گئیں، اور ملزمان کے خلاف مقدمات درج کرکے تحقیقات کا آغاز کر دیا گیا ہے۔

ترجمان نے کہا کہ اے این ایف تعلیمی اداروں اور عوامی مقامات پر منشیات کے خلاف اپنی کارروائیاں مزید تیز کرے گی تاکہ نوجوان نسل کو اس لعنت سے محفوظ رکھا جا سکے۔