چودھری پرویز الہٰی کی ایک روزہ حاضری معافی کی درخواست منظور

اینٹی کرپشن عدالت نے چودھری پرویز الہٰی کی ایک روزہ حاضری معافی کی درخواست منظور کر لی

لاہور

اینٹی کرپشن عدالت لاہور نے سابق وزیراعلیٰ پنجاب چودھری پرویز الہٰی کی ایک روزہ حاضری سے استثنا کی درخواست منظور کر لی۔ ان کے وکیل نے مؤقف اختیار کیا کہ موکل کی طبیعت ناساز ہے، جس پر عدالت نے درخواست منظور کرتے ہوئے انہیں آج کی سماعت سے حاضری معافی دے دی۔

اینٹی کرپشن عدالت کے جج جاوید اقبال وڑائچ نے پنجاب اسمبلی میں مبینہ غیر قانونی بھرتیوں کے کیس کی سماعت کی۔ سماعت کے دوران سرکاری وکیل تنویر چودھری عدالت میں پیش ہوئے جبکہ شریک ملزمان اعجاز، زوہیب اور حیدر شفقات نے اپنی بریّت کی درخواستیں دائر کیں۔ عدالت نے ان درخواستوں پر اینٹی کرپشن حکام کو نوٹس جاری کرتے ہوئے آئندہ سماعت پر دلائل طلب کر لیے۔

اسی طرح شریک ملزم مختار رانجھا کی بریّت کی درخواست پر بھی عدالت نے وکلا سے اگلی سماعت پر دلائل مانگ لیے۔ بعدازاں عدالت نے کیس کی سماعت 8 اکتوبر تک ملتوی کر دی۔