پارلیمنٹ لاجز کے نئے بلاک کی تعمیر 13 سال بعد دوبارہ شروع

پارلیمنٹ لاجز کے نئے بلاک کی تعمیر 13 سال بعد دوبارہ شروع، محسن نقوی کی ہدایت پر کام تیز

اسلام آباد

شمشاد مانگٹ

پارلیمنٹ لاجز کے نئے بلاک کی تعمیر کا منصوبہ 13 سال کی تاخیر کے بعد ایک بار پھر فعال کر دیا گیا ہے۔ وفاقی وزیر داخلہ محسن نقوی کی ہدایت پر منصوبے پر تیزی سے کام کا آغاز کر دیا گیا ہے اور اسے چار ماہ میں مکمل کرنے کی ہدایت جاری کی گئی ہے۔

آج وفاقی وزیر داخلہ محسن نقوی اور وزیر مملکت برائے داخلہ طلال چودھری نے پارلیمنٹ لاجز کے زیر تعمیر نئے بلاک کا دورہ کیا۔ اس موقع پر تعمیراتی پیش رفت کا معائنہ کیا گیا اور حکام کو ہدایت دی گئی کہ منصوبے کو ہنگامی بنیادوں پر مکمل کیا جائے۔

محسن نقوی کا کہنا تھا کہ منصوبے کے لیے فنڈز کی منظوری دی جا چکی ہے اور جلد از جلد تکمیل کے بعد تمام اراکین پارلیمنٹ کو رہائش کی سہولت فراہم ہو سکے گی۔

اس دوران چیئرمین سی ڈی اے محمد علی رندھاوا نے بریفنگ دیتے ہوئے بتایا کہ یہ منصوبہ 2012 میں کنٹریکٹ پر دیا گیا تھا، جسے 2013 میں مکمل ہونا تھا۔ تاہم ٹھیکیدار کی جانب سے کام روکنے اور قانونی پیچیدگیوں کے باعث منصوبہ تعطل کا شکار ہو گیا۔ بعد ازاں اسے 2014 تک توسیع دی گئی مگر عملی پیش رفت نہ ہو سکی۔

نئے بلاک میں 104 رہائشی یونٹس شامل ہوں گے، جو مکمل ہونے کے بعد پارلیمنٹ لاجز کی گنجائش میں اضافہ کریں گے۔

اس موقع پر وفاقی سیکرٹری داخلہ خرم آغا، ڈپٹی کمشنر اسلام آباد عرفان میمن اور دیگر اعلیٰ حکام بھی موجود تھے۔