ایف آئی اے کا بڑا ایکشن، کرپشن اور جعلسازی میں ملوث سرکاری افسر سمیت 6 ملزمان گرفتار

ایف آئی اے کا بڑا ایکشن، کرپشن اور جعلسازی میں ملوث سرکاری افسر سمیت 6 ملزمان گرفتار

بی یو پیز میں دھوکہ دہی، قومی خزانے کو لاکھوں کا نقصان — ایف جی ای ایچ ایف کا ڈپٹی ڈائریکٹر بھی گرفتار

اسلام آباد

شمشاد مانگٹ

ایف آئی اے اینٹی کرپشن سرکل اسلام آباد نے بڑی کارروائی کرتے ہوئے کرپشن، بدعنوانی اور دھوکہ دہی میں ملوث سرکاری افسر سمیت 6 ملزمان کو گرفتار کر لیا۔

ترجمان ایف آئی اے کے مطابق گرفتار ملزمان میں محمد منیر، عابد علی، محمد عمران، عماد احمد، سعد احمد اور اشتیاق احمد شامل ہیں۔ ان میں سے محمد منیر فیڈرل گورنمنٹ ایمپلائز ہاؤسنگ فاؤنڈیشن (FGEHF) میں بطور ڈپٹی ڈائریکٹر تعینات تھا۔

ابتدائی تفتیش کے مطابق ملزمان نے اختیارات کا ناجائز استعمال کرتے ہوئے جعل سازی اور دھوکہ دہی کے ذریعے رقوم ہتھیائیں۔ وہ اسلام آباد کے موضع تھلہ سیداں جی 14 سب سیکٹرز میں سپلیمنٹری ایوارڈ آف بلٹ اپ پراپرٹیز (BUPs) کے معاملات میں ملوث پائے گئے۔

تحقیقات سے انکشاف ہوا کہ ملزمان نے اصل مالکان کے بی یو پیز کے ساتھ ساتھ 5 بی یو پیز پر غیر قانونی طور پر پرائیویٹ افراد کو شریک مالک ظاہر کیا۔ بعد ازاں ان جعلی شریک مالکان نے جھوٹے کوائف کی بنیاد پر رقوم وصول کیں۔

ایف آئی اے کے مطابق یہ دھوکہ دہی اور جعلسازی سرکاری اہلکاروں کی ملی بھگت سے کی گئی جس کے نتیجے میں قومی خزانے کو لاکھوں روپے کا نقصان پہنچا۔

گرفتار ملزمان کے خلاف مقدمہ درج کر لیا گیا ہے جبکہ مزید تحقیقات جاری ہیں۔