فیلڈ مارشل سید عاصم منیر کا قصور اور ملتان کے سیلاب متاثرہ علاقوں کا دورہ

فیلڈ مارشل سید عاصم منیر کا قصور اور ملتان کے سیلاب متاثرہ علاقوں کا دورہ

آبادکاری و بحالی میں مکمل تعاون کی یقین دہانی، سول و فوجی اداروں کی مربوط کوششوں پر زور

راولپنڈی

فیلڈ مارشل سید عاصم منیر نے قصور سیکٹر اور جلالپور پیروالا ملتان میں قائم سیلاب ریلیف کیمپس کا دورہ کیا اور متاثرین کو بحالی و آبادکاری میں مکمل تعاون کی یقین دہانی کرائی۔

پاک فوج کے شعبہ تعلقات عامہ (آئی ایس پی آر) کے مطابق، دورے کا مقصد موجودہ سیلابی صورتحال اور جاری امدادی سرگرمیوں کا جائزہ لینا تھا۔ اس موقع پر فیلڈ مارشل کو سیلاب زدہ علاقوں میں جاری ریسکیو اور ریلیف آپریشنز کی تفصیلات سے آگاہ کیا گیا۔

قصور اور ملتان کے متاثرہ علاقوں کے دورے کا مقصد سول انتظامیہ اور فوج کے درمیان ہم آہنگی کو مزید بہتر بنانا تھا تاکہ متاثرہ عوام کو زیادہ مؤثر امداد فراہم کی جا سکے۔ اس موقع پر چیف سیکرٹری پنجاب اور سول انتظامیہ کے دیگر اعلیٰ حکام بھی موجود تھے۔

فیلڈ مارشل سید عاصم منیر نے سول انتظامیہ سے گفتگو میں اچھی حکمرانی اور عوامی شمولیتی ترقی کی اہمیت پر زور دیا۔ انہوں نے کہا کہ بار بار آنے والے سیلابی نقصانات سے عوام کو محفوظ رکھنے کے لیے درکار انفراسٹرکچر کی ترقی سمیت تمام اقدامات فوری طور پر کیے جائیں، کیونکہ ریاست ہر سال قیمتی جانوں اور املاک کے نقصان کی متحمل نہیں ہو سکتی۔

انہوں نے مزید کہا کہ سیلاب سے متاثرہ افراد کو درپیش چیلنجز سے نمٹنے کے لیے سول اور فوجی اداروں کی مربوط کوششیں نہایت اہم ہیں۔ پاک فوج عوامی فلاح و بہبود کے اقدامات میں ہمیشہ بھرپور کردار ادا کرتی رہے گی۔

بعد ازاں فیلڈ مارشل نے متاثرین سے ملاقات کی اور ان کی آبادکاری اور بحالی کے عمل میں مکمل تعاون کی یقین دہانی کرائی۔ متاثرین نے بروقت امداد فراہم کرنے پر پاک فوج کا دلی شکریہ ادا کیا۔