انٹرنیشنل ویمن پولیس ایوارڈ 2025 پاکستان کی ایس پی عائشہ بٹ کے نام

ایس پی عائشہ بٹ نے پاکستان کا نام روشن کر دیا، انٹرنیشنل ویمن پولیس ایوارڈ 2025 حاصل

لاہور

پنجاب پولیس کی باہمت اور فرض شناس خاتون افسر ایس پی عائشہ بٹ نے بین الاقوامی سطح پر پاکستان کا پرچم بلند کر دیا۔ انہیں انٹرنیشنل ایسوسی ایشن آف ویمن پولیس (IAWP) کی جانب سے “Excellence in Performance Award 2025” سے نوازا گیا۔

پنجاب پولیس کے ترجمان کے مطابق یہ اعزاز اسکاٹ لینڈ کے شہر گلاسگو میں منعقدہ 62ویں سالانہ کانفرنس کے دوران دیا گیا، جس میں دنیا کے 40 سے زائد ممالک سے تعلق رکھنے والی 300 سے زائد خواتین پولیس افسران نے شرکت کی۔

تقریب میں IAWP کی صدر جولیا جیگر نے ایس پی عائشہ بٹ کو ان کی شاندار کارکردگی کے اعتراف میں یہ عالمی ایوارڈ پیش کیا۔ یہ اعزاز ہر سال دنیا بھر سے صرف ایک ایسی خاتون پولیس افسر کو دیا جاتا ہے جو اپنے معاشرے میں نمایاں خدمات انجام دیتی ہے۔

ایس پی عائشہ بٹ اس وقت سٹی ٹریفک آفیسر (CTO) گوجرانوالہ کے طور پر فرائض سرانجام دے رہی ہیں۔

انہیں یہ ایوارڈ ٹریفک سیفٹی پولیسنگ، عوام اور پولیس کے درمیان اعتماد و روابط کو فروغ دینے اور ذمہ داریوں کی ادائیگی میں شاندار کارکردگی پر دیا گیا۔

پنجاب پولیس کی قیادت اور افسران نے ایس پی عائشہ بٹ کو اس اعزاز پر مبارکباد پیش کرتے ہوئے اسے پوری فورس کے لیے فخر کا لمحہ قرار دیا۔