ضلع مہمند میں پیرا میڈیکل بھرتیوں میں بے ضابطگیاں : ‏وزیراعلیٰ سہیل آفریدی کا نوٹس ، فوری تحقیقات کا حکم

ضلع مہمند میں پیرا میڈیکل بھرتیوں میں بے ضابطگیاں : ‏وزیراعلیٰ سہیل آفریدی کا نوٹس ، فوری تحقیقات کا حکم

پشاور

وزیراعلیٰ خیبرپختونخوا محمد سہیل آفریدی کی ہدایت پر محکمہ اسٹیبلشمنٹ نے ضلع مہمند میں پیرا میڈیکل عملے کی بھرتیوں میں مبینہ بے ضابطگیوں کی تحقیقات کے لیے خصوصی کمیٹی تشکیل دے دی ہے۔ اس حوالے سے باضابطہ نوٹیفکیشن چیف سیکریٹری خیبر پختونخوا کے دفتر سے جاری کر دیا گیا ہے۔

کمیٹی میں تشفین حیدر، ڈائریکٹر جنرل کھیل خیبرپختونخوا، اور ارشاد علی، ایڈیشنل سیکریٹری فنانس ڈیپارٹمنٹ شامل ہیں۔ کمیٹی کو سات (7) ورکنگ ڈیز کے اندر تحقیقات مکمل کر کے اپنی رپورٹ پیش کرنے کی ہدایت کی گئی ہے۔

وزیراعلیٰ محمد سہیل آفریدی نے اس بات پر زور دیا ہے کہ سرکاری بھرتیوں میں شفافیت اور میرٹ کے اصولوں پر کسی صورت سمجھوتہ نہیں کیا جائے گا۔ انہوں نے کہا کہ صوبائی حکومت اقرباپروری، بدعنوانی یا کسی بھی غیر قانونی عمل کو برداشت نہیں کرے گی۔ ان کا کہنا تھا کہ تمام تقرریاں صرف اور صرف اہلیت، دیانت اور شفافیت کی بنیاد پر کی جائیں گی۔

وزیراعلیٰ نے کہا کہ صوبے میں سرکاری اداروں میں شفافیت اور میرٹ کا قیام ان کی حکومت کی اولین ترجیح ہے۔ ان کی حکومت کسی بھی غیر قانونی عمل یا بدعنوانی کے خلاف بھرپور کارروائی کرے گی تاکہ عوام کو بہترین خدمات فراہم کی جا سکیں۔