مون سون مکمل ختم ، تمام دریاؤں میں صورتحال نارمل ہے،عرفان علی کاٹھیا

مون سون مکمل ختم ، تمام دریاؤں میں صورتحال نارمل ہے،عرفان علی کاٹھیا

لاہور

ڈائریکٹر جنرل پی ڈی ایم اے پنجاب عرفان علی کاٹھیا نے کہا ہے کہ مون سون 2025اب مکمل ختم ہوچکا ہے، تمام دریاؤں میں اب صورتحال نارمل ہوگئی ہے۔

پریس کانفرنس کرتے ہوئے عرفان کاٹھیا نے بتایا کہ سیلابی کیفیت میں جو بھی صورتحال ہوئی، اس کے بارے آگاہ کریں گے، تمام دریا معمول کے مطابق بہہ رہے ہیں، ستلج میں پانی کا بہاؤ تھوڑا سا زیادہ ہے۔

ان کا کہنا تھا کہ ایم فائیو موٹروے سیلابی پانی کی وجہ سے متاثر ہوئی، ایم فائیو موٹروے کو ہر قسم کی ٹریفک کیلئے بند کیا جاچکا ہے، پچھلے 48گھنٹے سے پانی کم ہورہا ہے، اب تک موٹروے پر کسی قسم کے بریچ کا فیصلہ نہیں ہوا۔
ان کا یہ بھی کہنا تھا کہ ٹیکنیکل ٹیم مسلسل صورتحال کومانیٹر کررہی ہے، پنجاب گورنمنٹ کو این ایچ اے اورسوئی ناردرن گیس کی پوری طرح سپورٹ رہی، آئندہ ہفتے کسی بارش کا امکان نہیں۔

انہوں نے بتایا کہ چناب میں مرالہ سے لے کر پنجند تک پانی کا بہاؤ معمول کے مطابق ہے، تمام شگاف آئندہ ایک ہفتے میں بھر دیے جائیں گے، راوی پر سدھنائی کے مقام پر بہت بڑا شگاف ڈالا گیا تھا، اس کو پوری طرح بھر دیا گیا ہے۔

عرفان علی کاٹھیا نے کہا کہ سیلابی پانی سندھ کیلئے زیادہ نقصان کا باعث نہیں بنا، دریائے سندھ میں سکھر کے مقام پر پانی کی سطح میں کمی کا سلسلہ جاری ہے، پانی کی سطح میں 62 ہزار 325 کیوسک کی کمی ریکارڈ کی گئی ہے۔