پی ٹی وی شدید مالی بحران کا شکار، ملازمین کو تنخواہیں دینے سے قاصر ، سحر کامران کا چیئرمین قائمہ کمیٹی اطلاعات کوخط

پی ٹی وی شدید مالی بحران کا شکار، ملازمین کو تنخواہیں دینے سے قاصر ، سحر کامران کا چیئرمین قائمہ کمیٹی اطلاعات کوخط

اسلام آباد

شمشاد مانگٹ

قومی اسمبلی کی رکن سحر کامران نے چیئرمین قائمہ کمیٹی برائے اطلاعات کو خط لکھ کر پاکستان ٹیلی ویژن (پی ٹی وی) کو درپیش سنگین مالی اور گورننس بحران پر فوری توجہ دینے کا مطالبہ کیا ہے۔

خط کے مطابق پی ٹی وی اس وقت شدید مالی مشکلات کا شکار ہے اور ملازمین کو تنخواہیں دینے سے قاصر ہے، جس کے باعث ادارہ مکمل مفلوجی کے خطرے سے دوچار ہو چکا ہے۔

سحر کامران نے مؤقف اختیار کیا کہ لائسنس فیس کے خاتمے نے پی ٹی وی کے ریونیو ماڈل کو متاثر کر کے ادارے کو واجبات ادا کرنے کے قابل نہیں چھوڑا۔

بڑھتے ہوئے واجبات اور مالی بحران سے ادارہ جاتی مفلوجی کا خطرہ پیدا ہو گیا ہے۔

سیاسی بنیادوں پر کی جانے والی متنازع تقرریوں نے ادارے کو مزید کمزور کیا۔

غیر پیشہ ورانہ فیصلوں نے نہ صرف پروگرامنگ کے معیار کو نقصان پہنچایا بلکہ پی ٹی وی کی ساکھ بھی بری طرح متاثر ہوئی۔

خط میں مزید کہا گیا کہ پی ٹی وی کے اینکر رضوان الرحمان (رضی) کے وی لاگ میں توہین آمیز تبصرے نے ادارے کی ساکھ مزید مجروح کی ہے، اس پر کمیٹی کو تحقیقات کرنی چاہئیں اور وزارتِ اطلاعات کو اپنی کارروائی رپورٹ کرنی چاہیے۔

سحر کامران نے زور دیا کہ وزارتِ اطلاعات فوری طور پر ایک اصلاحاتی روڈ میپ پیش کرے جس میں مالی استحکام،میرٹ پر تقرریاں اور معیاری پروگرامنگ کو یقینی بنایا جائے۔

ان کا کہنا تھا کہ ادارے کی ساکھ اور اعتبار کی بحالی کے لیے پروفیشنل اور ہائی کوالٹی پروگرامنگ ناگزیر ہے۔ انہوں نے مطالبہ کیا کہ کمیٹی ان معاملات کو آئندہ اجلاس کے ایجنڈے میں ترجیحی بنیادوں پر شامل کرے۔