لاہور( سپورٹس ڈیسک)قومی ٹیم کے سابق فاسٹ بالر اور لاہور قلندرز کے ہیڈ کوچ عاقب جاوید نے کہا ہے کہ فاسٹ بالر حارث رئوف کو ٹیسٹ کے بجائے ٹی 20 ورلڈکپ کے لیے تیار کیا جائے
،حال ہی میں ختم ہونے والے آئی سی سی ورلڈکپ میں حارث رف مہنگے ترین بالر رہے ہیں، انہوں نے مجموعی طور پر 9 میچز میں 6.89کی اوسط سے 527رنز دیکر ٹورنامنٹ کے سب سے مہنگے بالر کا منفی ریکارڈ اپنے نام کیا،
نجی ٹی وی چینل کے پروگرام میں گفتگو کرتے ہوئے عاقب جاوید کا کہنا تھا کہ حارث رئوف کو خود کو ٹیسٹ کے لیے کلیئر کر دینا چاہیے، جس نے ایک سال سے ٹیسٹ میچ نہیں کھیلا اس پر پریشر کیوں ڈالا جا رہا ہے، آپ نے ایک ٹیسٹ میچ اسے کھلایا تھا اور وہ ڈیڑھ دن میں ان فٹ ہو گیا تھا،عاقب جاوید کا کہنا تھا ایسا نہیں ہے کہ آپ نے خواہش ظاہر کی اور آپ ٹیسٹ کرکٹر بن گئے، اس کے لیے سالوں کی پریکٹس درکار ہوتی ہے، آپ کو دن میں تین سے چار سپیل کرنے پڑتے ہیں، 20اوورز کرنے پڑ جاتے ہیں،
کپتان، کوچ اور مینجمنٹ کو بھی سوچنا چاہیے کہ آپ نے ایک کھلاڑی کو جو ٹیسٹ کے لیے تیار ہی نہیں ہے اسے طویل فارمیٹ کی کرکٹ کھلا کر چھوڑنی ہے یا اس کھلاڑی کو جس فارمیٹ کے لیے وہ تیار ہے اسے اس میں کھلانا ہے، جس طرح حارث رئوف کو دکھایا جا رہا ہے وہ فاسٹ بالر کے ساتھ ناانصافی ہے،
اگر حارث آسٹریلیا جاتا اور کھیلتا تو شاید وہ ان فٹ ہو جاتا،عاقب جاوید نے پاکستان کرکٹ ٹیم کی سلیکشن کمیٹی کو مشورہ دیا کہ آپ حارث کو ٹیسٹ کے بجائے اگلے ٹی 20ورلڈکپ کے لیے تیار کریں، اسے نیشنل ٹی 20کپ کھلائیں اور نیوزی لینڈ کے خلاف 5ٹی 20میچوں کی سیریز کھلائیں اور پھر دیکھیں کہ حارث کو کیسے ٹی 20ورلڈکپ میں استعمال کیا جا سکتا ہے۔
Comments are closed.