سزاوں کا مقابلہ سر اٹھا کر کرونگی ، اپنے لیڈر سے بے وفائی نہیں کرونگی ، زرتاج گل

سزاوں کا مقابلہ سر اٹھا کر کرونگی ، اپنے لیڈر سے بے وفائی نہیں کرونگی ، زرتاج گل

مجھے دس سال کی سزا پاکستان سے محبت اور عمران خان سے وفاداری کی وجہ سے دی گئی، بیان

اسلام آباد

پاکستان تحریک انصاف ( پی ٹی آئی ) کی رہنما اور سابق وفاقی وزیر زرتاج گل کا انسداد دہشت گردی عدالت کی جانب سے 9 مئی کیس میں سزا سنائے جانے پر ردعمل سامنے آگیا۔

واضح رہے کہ انسداد دہشت گردی عدالت نے اپوزیشن لیڈر قومی اسمبلی عمر ایوب ، سینیٹ میں اپوزیشن لیڈر شبلی فراز اور رکن قومی اسمبلی زرتاج گل سمیت تحریک انصاف کے 108 رہنماؤں اور کارکنوں کو 10 سال تک قید کی سزائیں سنا دی ہے۔

سماجی رابطے کے پلیٹ فارم ایکس پر جاری اپنے خصوصی بیان میں زرتاج گل نے عدالتی فیصلے پر ردعمل دیتے ہوئے کہا کہ ’ میرے بابا گل شیر خان وزیر نے آج تک مجھے حرام کا نوالہ نہیں کھلایا، وزیر قبیلے کے ناطے بہادری میرے پختون خون میں رچی بسی ہے۔ ‘

سابق وفاقی وزیر نے کہا کہ ’ وفاداری، جرات اور بہادری میں نے اپنے لیڈر عمران خان سے سیکھی۔ ‘

زرتاج گل کا کہنا تھا کہ ’ہم نے اس وقت بھی اپنا وطن نہیں چھوڑا جب میرے ماں باپ نے میرے جوان بھائی جاوید عالم وزیر شہید کی بم دھماکے میں جلی ہوئی لاش وصول کی۔‘

انہوں نے کہا کہ ’عمران خان کے نام پر ڈیرہ غازی خان کے لوگوں نے وفا کی اور کیا خوب وفا نبھائی، مجھے “دھی رانی” کا لقب دیا، جھکنا، بک جانا یا ڈرنا میں نے کبھی نہیں سیکھا۔ ‘

ان کا کہنا تھا کہ ’ مجھے دس سال کی سزا پاکستان سے محبت اور عمران خان سے وفاداری کی وجہ سے دی گئی۔‘

انہوں نے کہا کہ ’ جو لوگ مجھے نشانِ عبرت بنانا چاہتے ہیں وہ سمجھتے ہیں کہ اس ملک میں صرف خاندانِ شریف اور خاندانِ زرداری کی بیٹیاں ہی سیاست کر سکتی ہیں، یہ ان کی بہت بڑی غلط فہمی اور بھول ہے۔‘

ان کا کہنا تھا کہ ’میں سر اٹھا کر مقابلہ کروں گی اور اپنے لیڈر عمران خان کے ساتھ وفا نبھاؤں گی۔ ‘

زرتاج گل نے کہا کہ ’ اپنی سیاست، ڈیرہ غازی خان کے لوگوں اور اپنے خاندان کے وقار پر کوئی آنچ نہیں آنے دوں گی۔ ‘

انہوں نے مزید کہا کہ ’ انشاءاللہ، ڈیرہ غازی خان کے وڈیروں اور جاگیرداروں پر میری چادر بھاری ہوگی، یہ ملک میرا ہے، سیاست میری ہے اور یہ میدان بھی میرا ہے، انشاءاللہ ۔‘