صدر آصف علی زرداری اور وزیراعظم شہباز شریف کا قائداعظم کے 77ویں یومِ وفات پر خراجِ عقیدت

صدر آصف علی زرداری اور وزیراعظم شہباز شریف کا قائداعظم کے 77ویں یومِ وفات پر خراجِ عقیدت

اسلام آباد

شمشاد مانگٹ

صدرِ مملکت آصف علی زرداری اور وزیراعظم محمد شہباز شریف نے بانیٔ پاکستان قائداعظم محمد علی جناح کے 77 ویں یومِ وفات کے موقع پر انہیں خراجِ عقیدت پیش کیا اور قوم پر زور دیا کہ وہ قائد کے اصولوں کو مشعلِ راہ بنائے۔

صدر آصف علی زرداری نے اپنے پیغام میں کہا کہ پاکستانی عوام کو چاہیے کہ وہ انصاف، مساوات، رواداری اور جمہوریت پر مبنی قائداعظم کے وژن سے رہنمائی حاصل کریں۔ انہوں نے کہا کہ قائداعظم نے برصغیر کے مسلمانوں کو نہ صرف ایک آزاد وطن دیا بلکہ انہیں وقار، شناخت اور خودداری بھی بخشی۔

صدرِ مملکت نے مزید کہا کہ قائداعظم کا خواب ایک ترقی پسند اور جامع قوم تھی جہاں تمام شہری بلاامتیاز مذہب، ذات اور عقیدہ برابر کے حقوق اور مواقع رکھتے ہوں۔ بھارت میں اقلیتوں کے ساتھ روا رکھے جانے والے رویے کا ذکر کرتے ہوئے انہوں نے کہا کہ آر ایس ایس کے زیرِ اثر حکومت میں اقلیتوں کے ساتھ امتیازی سلوک دو قومی نظریے کی سچائی کو ایک بار پھر ثابت کر رہا ہے۔ آج بھارت کی اقلیتیں بھی اس حقیقت کو تسلیم کرنے پر مجبور ہیں کہ ان کے سیاسی، مذہبی اور سماجی حقوق محفوظ نہیں رہے۔

صدر زرداری نے اعتراف کیا کہ پاکستان کو اس وقت اقتصادی مشکلات، ماحولیاتی چیلنجز، انتہاپسندی اور ادارہ جاتی اصلاحات جیسے مسائل کا سامنا ہے، تاہم انہوں نے کہا کہ قوم کو تحریکِ پاکستان کے رہنماؤں کے نقشِ قدم پر چلنا چاہیے جنہوں نے اتحاد اور عزم کے ساتھ مشکلات کا مقابلہ کیا۔

وزیراعظم محمد شہباز شریف نے بھی قائداعظم کو زبردست خراجِ تحسین پیش کرتے ہوئے کہا کہ برصغیر کے مسلمانوں کو ایک آزاد وطن دلانے کا سہرا قائداعظم کی سیاسی بصیرت اور مدبرانہ قیادت کو جاتا ہے۔ انہوں نے کہا کہ قائداعظم نے سیاسی، مذہبی، معاشی اور ثقافتی حقوق کے تحفظ کے لیے بے مثال جدوجہد کی جس کے نتیجے میں پاکستان دنیا کی پہلی نظریاتی اسلامی ریاست کی صورت میں وجود میں آیا۔

وزیراعظم نے کہا کہ تقسیمِ ہند کے وقت بڑے پیمانے پر ہجرت، وسائل کی کمی اور دیگر کٹھن چیلنجز کے باوجود قائداعظم نے ایک مضبوط پاکستان کی بنیاد رکھی اور قوم کو حوصلہ دیا۔ انہوں نے اس عزم کا اظہار کیا کہ موجودہ حکومت قائداعظم کے نظریے کے مطابق ایک ایسا پاکستان تعمیر کرنے کے لیے کوشاں ہے جہاں مذہبی آزادی، مساوی حقوق، انصاف، جمہوریت اور اقلیتوں کے تحفظ کو یقینی بنایا جا سکے۔