سی این ایف کی سیالکوٹ میں بڑی کارروائی، 7 ہزار کلوگرام افیون برآمد، دو ملزمان گرفتار

سی این ایف کی سیالکوٹ میں بڑی کارروائی، 7 ہزار کلوگرام افیون برآمد، دو ملزمان گرفتار

لاہور

پنجاب انسدادِ نارکوٹکس فورس (سی این ایف) نے سیالکوٹ کی تحصیل سمبڑیال میں ایک بڑی کارروائی کے دوران سات ہزار کلوگرام افیون قبضے میں لینے اور دو ملزمان کو گرفتار کرنے کا دعویٰ کیا ہے۔

 سی این ایف کا کہنا ہے کہ ابتدائی تحقیقات سے یہ بات سامنے آئی ہے کہ برآمد شدہ افیون کو پنجاب اور سندھ کے مختلف شہروں میں چرس تیار کرنے کے لیے منتقل کیا جانا تھا۔ ادارے کے مطابق گرفتار ملزمان کے خلاف قانونی کارروائی شروع کر دی گئی ہے۔

سی این ایف کے بیان میں کہا گیا ہے کہ گزشتہ دو ماہ کے دوران پنجاب میں مختلف ٹارگٹڈ کارروائیوں کے نتیجے میں بھاری مقدار میں منشیات برآمد کی گئی ہیں جن کی مارکیٹ ویلیو سات کروڑ اسی لاکھ روپے سے زائد ہے۔

ادارے نے مزید کہا ہے کہ منشیات فروش نیٹ ورکس کے خلاف خفیہ معلومات پر مبنی کارروائیاں جاری رہیں گی تاکہ ان مافیاز کا مکمل خاتمہ ممکن ہو سکے۔

واضح رہے کہ رواں برس جنوری میں وفاقی وزیر داخلہ و انسدادِ منشیات محسن نقوی نے بتایا تھا کہ سال 2024 کے دوران اب تک دو ہزار سے زائد آپریشنز میں دس ارب ڈالر مالیت کی منشیات ضبط کی گئی ہیں۔ انہوں نے اس عزم کا اظہار کیا تھا کہ نئی نسل کو منشیات کی لعنت سے بچانے کے لیے کریک ڈاؤن پوری قوت سے جاری رکھا جائے گا۔

محسن نقوی نے اسلام آباد میں اینٹی نارکوٹکس فورس کے ہیڈکوارٹرز کے دورے کے موقع پر کہا تھا کہ منشیات کے مکروہ دھندے میں ملوث افراد کسی رعایت کے مستحق نہیں ہیں۔ ان کا کہنا تھا کہ اس مسئلے پر قابو پانے کے لیے فوری اور کثیرالجہتی اقدامات کی ضرورت ہے۔

انہوں نے یہ بھی اعلان کیا تھا کہ خلیجی ممالک کے ساتھ انسدادِ منشیات کے شعبے میں تعاون بڑھانے کے لیے جلد ایک بین الاقوامی کانفرنس منعقد کی جائے گی، جس میں خلیجی ممالک کی اینٹی نارکوٹکس فورسز کے سربراہان کو مدعو کیا جائے گا۔