دہشت گردی کے خاتمہ کے لیے افغانستان کی صلاحیت بڑھانے کو تیار ہیں۔پاکستان

اسلام آباد(زور آور نیوز)وزارتِ خارجہ کے ترجمان نے کہا ہے کہ پاکستان دہشت گرد تنظیموں کا مقابلہ کرنے کے لیے افغانستان کی صلاحیت بڑھانے کے لیے تیار ہے۔
ترجمان دفتر خارجہ نے افغانستان سے دہشت گردی کے خطرے سے متعلق وزیر خارجہ بلاول بھٹو زرداری کے ریمارکس کی وضاحت کر دی۔وزارتِ خارجہ کے ترجمان کا کہنا ہے کہ وزیر خارجہ کے ریمارکس نہ تو نئے ہیں اور نہ ہی غیر معمولی، پاکستان نے ہمیشہ کہا ہیکہ وہ ملکی یا غیر ملکی تمام خطرات کے خلاف اپنے دفاع کی صلاحیت رکھتا ہے۔انہوں نے کہا کہ افغان سر زمین پاکستان کے اندر دہشت گردی کی کارروائیوں کے لیے لانچنگ پیڈ نہ بنے۔ترجمان کاکہنا تھا کہ دہشت گردی کے خاتمے کے لیے افغانستان کے ساتھ بات چیت کی پالیسی کا اعادہ ہے۔وزارتِ خارجہ کے ترجمان کا کہنا ہے کہ دہشت گردی کے خاتمے کے لیے دونوں ممالک کو مل کر کام کرنا ہوگا۔